A CIG-Industria desenvolveu unha concentración na sede da empresa na Rúa de Valdeorras polo mantemento do poder adquisitivo e do emprego
Ourense, 6 de xuño de 2025.
O práctica totalidade do persoal operario galego de Iberdrola secundou hoxe a folga convocada por ELA, CCOO e UGT en demanda dun convenio colectivo digno, xornada que a CIG-Industria aproveitou para desenvolver unha concentración diante da sede da compañía na Rúa de Valdeorras para reclamar a recuperación do poder adquisitivo, vinculando a revisión salarial ao IPC, e polo mantemento do emprego no noso país.
Iberdrola conta en Galiza con arredor de 250 persoas traballadoras, das que unicamente optaron por non sumarse ao paro as integrantes do equipo técnico. Mentres que o seguimento por parte do persoal operario foi practicamente total.
O delegado da CIG en Iberdrola tomou a palabra ao remate da mobilización para denunciar que seguen a perder poder adquisitivo (un 16% en catro anos) mentres os beneficios empresariais baten récords anuais (40% neste meso período) e os dirixentes, directivos e accionistas “continúan a enriquecerse a pasos axigantados”.
Neste senso, lamentou que a compañía se negue a actualizar os salarios “como mínimo conforme ao IPC real” e a reducir a xornada laboral a 35 horas semanais, dúas das principais reivindicacións da parte social durante a actual negociación do convenio colectivo. Outras das demandas pasan por garantir o mantemento do emprego e ampliar o dereito de conciliación.
Por iso, e ante a actitude inmobilista da dirección, as centrais decidiron convocar unha primeira xornada de folga que a CIG apoiou e fixo un chamamento a secundar, aproveitando tamén para mobilizarse diante a empresa na Rúa de Valdeorras de 11:00 a 12:00 horas.
