Un traballador do cátering da Pulpería Aurora faleceu na tarde do sábado na LII Festa do Viño Tinto do Salnés, que se celebraba no pavillón de Barrantes. O home, (J.F.L de 51 anos ) , sufriu unha parada respiratoria mentres participaba no servizo do Xantar de Confraternidade, o banquete popular que reúne por centos de asistentes nesta tradicional festa do viño.
Ante a emerxencia, activáronse os servizos sanitarios, mobilizándose ambulancias do 061, efectivos de Protección Civil de Ribadumia, médicos do PAC de Cambados e persoal de Emerxencias Cambados. Con todo, a pesar dos esforzos por reanimalo, o cociñeiro non superou o episodio.
Tras o impacto inicial, o ambiente festivo tinguiuse de emoción cando os compañeiros do servizo de cociña renderon unha sentida homenaxe ao falecido. Ao concluír o evento gastronómico, congregáronse nun emotivo xesto de despedida, dedicándolle un cálido aplauso que se estendeu entre os asistentes ao Tinto.
A noticia conmocionou á comunidade, especialmente nun día marcado pola celebración e a convivencia en torno ao viño do Salnés. As autoridades non detallaron aínda as causas concretas do falecemento, aínda que todo apunta a un tráxico desenlace natural.
A Festa do Viño Tinto, unha das citas máis destacadas do verán pontevedrés, continuou a súa programación, aínda que cun ton máis sobrio tras o suceso.
