Ribadavia viviu hoxe unha xornada histórica ao converterse no escenario central da LXVI Asemblea Xeral Ordinaria de Caminos de Sefarad, nun ano no que a vila ostenta a presidencia desta entidade de ámbito estatal que agrupa vinte e unha cidades con patrimonio vinculado ás comunidades sefardís. A reunión, celebrada na Granxa de Outeiro en Francelos, serviu non só para abordar asuntos de xestión e planificación da entidade, senón para marcar un antes e un despois no labor de preservación e posta en valor da herdanza cultural que une ás cidades membro: a proclamación da Declaración de Ribadavia, un acordo institucional sen precedentes polo que se establecerá oficialmente o 31 de marzo como o “Día da Cultura Sefardí” en todas as localidades integradas en Caminos de Sefarad.
Esta proposta, impulsada desde a presidencia que exerce este ano o Concello de Ribadavia, foi aprobada por unanimidade polos representantes municipais e persegue un dobre obxectivo: por unha banda, recoñecer a pegada das comunidades que habitaron a Península durante séculos e que deron lugar a unha cultura viva e resiliente, e por outra, consolidar un espazo anual de memoria, divulgación e encontro arredor dun patrimonio común.
A elección do 31 de marzo non é casual, pois coincide coa data do Edicto de Granada de 1492, documento que supuxo un punto de inflexión histórico e que, lonxe de borrar unha identidade cultural, contribuíu á súa proxección internacional ata os nosos días.
A través desta declaración, Ribadavia dá un paso decisivo para que a historia compartida se converta tamén nun motor de futuro, cunha celebración que incluirá actividades culturais, educativas, artísticas e turísticas nas diferentes cidades, fortalecendo así a identidade de Caminos de Sefarad como rede de cooperación activa. No transcurso da asemblea tamén se abordaron cuestións relevantes como o balance de actividades realizadas no primeiro semestre do ano, a aprobación dos orzamentos e a presentación das novas adhesións en estudo.
Un dos proxectos destacados foi o avance do programa Experiencias Turismo España, que cun orzamento de 150.000 euros busca reforzar o atractivo dos destinos integrados na rede a través de accións que promovan a sustentabilidade, o emprendemento local e a creación de produtos culturais singulares e diferenciados. O obxectivo último é que a riqueza histórica asociada ao mundo sefardí se traduza tamén en desenvolvemento económico sostible, reforzando a conectividade entre institucións, museos, comercio local e axentes turísticos, nun ecosistema que combina experiencias presenciais e dixitais co visitante como protagonista.
Como colofón a esta xornada tan significativa, Ribadavia acollerá esta noite a primeira Gala de Premios Caminos de Sefarad, un evento creado para conmemorar o 30º aniversario da entidade e recoñecer publicamente o labor de persoas e institucións que contribuíron de maneira exemplar á difusión deste legado cultural. Entre os galardoados nesta primeira edición están o Museo Sefardí de Toledo, o programa Shalom de RTVE e Rafael Pérez de la Concha, cuxa traxectoria profesional está intimamente ligada á promoción e defensa da memoria sefardí. A entrega dos premios terá lugar durante unha cea institucional na que se fará entrega dunha placa conmemorativa co lema Caminos de Sefarad, como símbolo de gratitude e admiración polo labor desenvolvido.
O Concello de Ribadavia agradece profundamente a confianza depositada por parte das cidades da rede para acoller esta asemblea tan especial e reafirma o seu compromiso firme coa protección e promoción da memoria histórica que forma parte esencial da súa identidade. A través da Declaración de Ribadavia, a vila consolídase como un referente estatal na defensa dun legado que, lonxe de pertencer só ao pasado, segue a construír pontes cara ao futuro.
