As persoas amantes da música polifónica teñen este vindeiro sábado, 26 de xullo, unha cita no Auditorio Manuel María do Carballiño no ‘XXI Festival de Habaneras’ que cada verán organiza o Orfeón do Carballiño, cuxo presidente, Rogelio Rodríguez, e director, Cristian Casas, acompañaron esta mañá na presentación do evento ao concelleiro de Cultura, Diego Fernández.
O edil apuntou que “este festival é tamén unha homenaxe aos nosos emigrantes, cunhas cancións seleccionadas de gran calidade, e por iso facemos un chamamento á veciñanza para que acuda con tempo para ocupar o seu asento no Auditorio e poida desfrutar desta marabillosa música”. Rogelio Rodríguez avanzou que participarán no festival, dende as 20,30 horas, as corais coruñesa Souto da Igrexa de Meirás (Sada) e a polifónica pontevedresa de A Cañiza, ademais da sempre presente Rondalla Alfaia de Cenlle e a agrupación anfitriona, o Orfeón.
O presidente do Orfeón tamén desvelou que a persoa homenaxeada nesta edición será Carlos Núñez Deza, profesor do Conservatorio Profesional de Música de Ourense e autor da publicación que recolle as partituras do mestre, fundador e exdirector da agrupación carballiñesa, José Luis Reza Cabano. Pola súa banda, Cristian Casas subliñou que “todo o pobo coñece a nosas gañas e implicación para facer este festival, que é a nosa actividade insignia e que leva o nome do Carballiño polo exterior”.
O director do Orfeón salientou, en referencia a Carlos Núñez, o seu papel de promotor de iniciativas musicais para a mocidade, coma é o caso do festival “Ourencanto”, no que participaron o ano pasado máis de 400 coralistas infantís e xuvenís de Ourense e de fóra da provincia, e ao que adicarán unha canción interpretada conxuntamente polos grupos participantes no festival.
Cristian Casas animou ao público “a prepararse para desfutar e gozar” nesta cita das 20,30 horas do vindeiro sábado 26, con entrada totalmente libre e gratuíta.
