Un antes e un despois no desenvolvemento do turismo termal en Colombia. A celebración de Termatalia neste país reflicte a clara aposta das autoridades nacionais, rexionais e locais colombianas por engadir o turismo termal como un dos grandes atractivos para visitar “o país da beleza”. Termatalia contribuirá á creación da folla de roteiro do desenvolvemento do termalismo como un produto turístico, xa que se converteu no escenario no que converxeron todos os axentes, públicos e privados, que serán os responsables de redactar as normativas para promover e regular o turismo termal deste país.
Este foi un dos fíos condutores das intervencións das autoridades participantes no acto oficial de inauguración de Termatalia Colombia 2025. Celebrouse onte pola tarde (mércores 24 de setembro) no Parque Jaime Rook de Paipa e que foi o acto de inauguración máis participativo ata a data. Os veciños da municipalidade termal saíron á rúa para recibir aos participantes da feira que percorreron o centro da cidade acompañados pola Real Banda de Gaitas de Ourense. Foi unha emocionante tarde de convivencia e intercambio cultural na que o termalismo compartiu escenario e aplauso coas actuacións da Real Banda de Gaitas de Ourense e da Banda Sinfónica de Paipa e tamén con varios espectáculos de danza autóctona.
O acto inaugural de Termatalia Colombia 2025 contou coa participación do alcalde de Paipa, Germán Ricardo Camacho, que exerceu de anfitrión do evento; do asesor de Rexións da Gobernación de Boyacá, Fabio Medrano; do representante do Ministerio de Comercio, Industria e Turismo do Goberno de Colombia, Juan Sebastián Sánchez; do presidente da Asociación Hostaleira de Colombia -COTELCO, José Andrés Duarte; da responsable da área de Termalismo da Xunta de Galicia, Belén Gómez Quevedo; do presidente do Instituto para a Calidade Turística Española e a Sustentabilidade – ICTES, Miguel Mirones, e do director xerente de Expourense e director de Termatalia, Rogelio Martínez.
O director de Termatalia indicou durante a súa intervención que esperaba que “este evento obteña os mesmos éxitos que as edicións anteriores celebradas en Perú, Arxentina, México, Brasil e Uruguai e cuxos organizadores dixeron que a celebración de Termatalia no seu país supuxo un antes e un despois no desenvolvemento e promoción dos seus recursos termais. Desexamos que así sexa tamén en Paipa-Boyacá e que podamos comprobalo a curto prazo”. Fixo referencia tamén a que “Colombia teno todo para converterse nun destino termal de referencia, ten augas minerais en calidade e cantidade, ten infraestruturas, ten usuarios nacionais e internacionais e, sobre todo, ten moitas ganas”.
Os principais socios de Expourense na organización de Termatalia Colombia, a Alcaldía de Paipa e a Gobernación de Boyacá, destacaron neste acto que esta feira supón unha gran oportunidade para impulsar a economía local nun municipio no que a xestión termal é pública e no que os beneficios xurdidos da explotación das súas augas termais volven reverter na poboación. Foi o primeiro en crear un Instituto Termal de carácter municipal e hoxe en día é unha referencia en todo o país. Mostra do interese que suscita Termatalia en América Latina é que, nesta primeira xornada de feira, Expourense xa recolleu a primeira candidatura para acoller Termatalia no ano 2027 (en 2026 será en Ourense), a de Costa Rica – A Fortuna. Unha ampla delegación de representantes institucionais e empresarios do sector termal desprazáronse ata Paipa para asistir ao evento e presentar esta candidatura.
Termatalia Colombia 2025 continuará ata o venres 26 de setembro ofrecendo formación especializada a través do VI Congreso Internacional sobre Auga e Saúde e dos paneis especializados sobre termalismo nos que participan 55 relatores de 13 países.
