Dende o Partido Popular de Xinzo queremos expresar a nosa máis rotunda condena ante os feitos acontecidos, así como fronte a calquera campaña de manipulación, difamación ou ataque persoal dirixido contra o noso compañeiro Ricardo Sieiro por motivo da súa orientación sexual.
Consideramos absolutamente intolerable que, en pleno século XXI, se produzan comportamentos de carácter homófobo no ámbito público. Este tipo de actuacións vulneran de maneira directa a dignidade das persoas e atentan contra os principios máis básicos de igualdade e respecto que deben rexer a convivencia en Xinzo.
Queremos trasladar o noso apoio persoal, político e institucional ao noso compañeiro, ao tempo que reafirmamos con firmeza o noso compromiso coa defensa da liberdade, da igualdade real, do respecto mutuo e dos valores democráticos que deben guiar a acción pública.
OS MELLORES ESTABLECEMENTOS
Esiximos a rectificación inmediata dos responsables, a retirada de calquera contido ofensivo e o cesamento de toda actuación que contribúa á confrontación e á desinformación.
O Partido Popular continuará defendendo con determinación unha vila libre de calquera forma de discriminación, baseada no respecto, na igualdade efectiva e na protección dos dereitos de todas as persoas, sen excepción.
Fronte ao odio, responderemos sempre con firmeza democrática, dignidade institucional e defensa da liberdade.
