O 6 de marzo conmemórase o Día Mundial do Linfedema, unha patoloxía que afecta a arredor de 250 millóns de persoas en todo o mundo, segundo datos da Organización Mundial da Saúde (OMS), o que supón que 1 de cada 30 persoas convive con esta enfermidade. En Galicia estímase que preto de 100.000 persoas poderían ter algunha patoloxía relacionada co sistema linfático.
Malia estas cifras, as entidades que defenden os dereitos das persoas afectadas, como a Asociación Galega de Linfedema, Lipedema, Insuficiencia Venosa Crónica e outras patoloxías vasculares periféricas (AGL), denuncian que esta enfermidade segue a ser pouco coñecida e non recibe a atención que merece.
O linfedema é unha enfermidade crónica e progresiva do sistema linfático que pode provocar graves deformidades, discapacidades e complicacións potencialmente mortais. Ademais, quen a ten convive con dor, limitacións funcionais e infeccións recorrentes que repercuten tamén na saúde emocional e na calidade de vida das persoas afectadas, xerando importantes cargas psicolóxicas e económicas.
OS MELLORES ESTABLECEMENTOS
Existen dous tipos principais de linfedema: o linfedema primario, considerado unha enfermidade rara de orixe xenética, e o linfedema secundario, o máis frecuente, que pode aparecer como consecuencia de cirurxías oncolóxicas, tratamentos de radioterapia, insuficiencia venosa crónica ou traumatismos.
Demandas
Con motivo desta xornada, AGL (entidade integrada no movemento asociativo de COGAMI) quere poñer o foco no linfedema primario e pediátrico, para os que “o diagnóstico precoz e a investigación son de máxima importancia”, segundo explica o presidente da entidade, Juan Manuel Lameiro.
Aproveitando esta data conmemorativa, a asociación traslada unha serie de demandas co obxectivo de mellorar a atención ás persoas afectadas. Entre elas, reclaman un diagnóstico precoz que permita acceder a un tratamento rápido e axeitado, un maior investimento en investigación e o reforzo da formación dos profesionais sanitarios para evitar o empeoramento da saúde das persoas afectadas.
Ademais, consideran necesario informar e sensibilizar axeitadamente sobre esta doenza, garantir a equidade territorial para que o lugar de residencia non determine a calidade do tratamento recibido na sanidade pública e avanzar cara ao recoñecemento da discapacidade para as persoas con linfedema.
Desde AGL sinalan que moitas destas necesidades poderían abordarse coa creación dunha estratexia específica de linfedema en Galicia, formada por un equipo interdisciplinar con coñecementos especializados. Segundo explican, isto permitiría evitar diagnósticos erróneos ou tardíos e garantir tratamentos adecuados que non empeoren a saúde das persoas afectadas nin condicionen o seu día a día persoal, laboral e social.
Por último, desde a asociación lembran que as estratexias de humanización da sanidade pública deben partir da empatía e do compromiso institucional como primeiro paso para avanzar cara a unha atención máis xusta e adaptada ás necesidades das persoas con patoloxías do sistema linfático.
