No CPI Terras de Maside seguimos dando, un ano máis, un pasiño adiante cara á inclusión e á integración de todo o alumnado. Nesta liña, o centro levou a cabo un curso de formación en linguaxe de signos, unha iniciativa que xorde da realidade e das necesidades da nosa comunidade educativa, na que contamos coa presenza de dúas alumnas de etnia xitana xordomudas.
Esta actividade enmárcase dentro do compromiso do centro cunha educación máis accesible, participativa e respectuosa coa diversidade. Nela implicouse activamente a maior parte do alumnado, o profesorado e outros membros da comunidade educativa, demostrando que a inclusión é unha tarefa compartida e un valor fundamental para todos e todas.
Como froito deste traballo colectivo, realizouse a gravación de “Bubi” en linguaxe de signos, presentada ao concurso da Federación de Asociacións de Persoas Xordas de Galicia. Esta historia recolle a vivencia dun paxaro que desexa escoitar, comprender e expresar os seus sentimentos, así como os dos paxaros que o rodean.
A mensaxe de Bubi invítanos a reflexionar sobre a importancia de sentirse entendido, escoitado, valorado e acollido. Porque, en realidade, cada un de nós pode ser ese paxaro que precisa atopar o seu lugar e a comprensión dos demais.
Por unha educación sen barreiras, construímos xuntos a inclusión.
VOTAR POLO VIDEO BUBI: PREMER NA IMAXE
