A Denominación de Orixe Ribeiro volve estar de parabéns. Onte, durante a entrega de premios das Catas de Galicia 2026, que se celebrou no Auditorio de Lugo, o viño branco ‘Cuñas Davia’, de Adegas Valdavia, S.L., situadas en Cenlle, recibiu o máximo galardón, o Acio de Ouro, que o empraza como mellor viño branco de toda Galicia. Esta distinción foi concedida a esta Denominación de Orixe, a máis antiga de Galicia, por segundo ano consecutivo.
Na categoría específica de viños brancos da D.O. Ribeiro foron premiados os viños Mauro Estévez, de Adega Mauro Estévez, S.L., co Acio de Ouro; María Andrea, da adega Eduardo Rodríguez e Luz Cánovas, S.L., co Acio de Prata e Eduardo Bravo, de Viña Eduardo Bravo, S.L., co Acio de Bronce.
Pero os recoñecementos á D.O. Ribeiro non finalizan aí, o viño Castro do Coto Caíño Blanco, de Adega Castro Rei, S.L., levouse o Acio de Ouro na categoría de viños de variedades senlleiras e o Acio de Bronce recaeu no viño Máis de Cunqueiro Torrontés, de Adegas Cunqueiro, S.L. Para rematar, no apartado de viños brancos de colleitas anteriores, Eduardo Bravo 2024, de Viña Eduardo Bravo, S.L. alzouse co Acio de Bronce.
Concha Iglesias Pousa, presidenta do Consello Regulador da D.O. Ribeiro, ante os magníficos resultados comenta “que a D.O. Ribeiro logre a máxima distinción como Mellor Viño de Galicia por segundo ano consecutivo comprácenos sumamente, demostra que seguimos no bo camiño. Quero felicitar á adega gañadora do máximo galardón, Adegas Valdavia, así como tamén aproveito para felicitar ao resto de adegas premiadas, que lograron distincións noutras categorías”.
Ao certame vinícola, organizado por AGACAL-Consellería do Medio Rural da Xunta de Galicia, en colaboración cos consellos reguladores galegos, presentáronse un total de 429 referencias de viño (305 de branco e 124 de tinto) de 142 adegas diferentes, que foron catadas a cegas por un panel de cata formado por profesionais do sector, tanto nacionais como internacionais.
