A curtametraxe documental, e producida por Sony Music Vision, presenta tamén o seu cartel e tráiler oficiais
29 de setembro de 2026.– El Nieto Manuel, a curtametraxe documental dirixida por Darío Vázquez e producida por Sony Music Vision, competirá na Sección Oficial Nacional de Curtametraxe Documental Musical de IN-EDIT Barcelona, o Festival Internacional de Cine Documental Musical. Coincidindo co anuncio da súa participación no certame, a produción presenta o seu cartel e tráiler oficiais.
A película constrúe, a través das cartas, da voz e do arquivo familiar da avoa do protagonista, un relato íntimo sobre a memoria, o paso do tempo, a morte e o espertar artístico de Manuel Navas, El Nieto Manuel.
Cando a memoria da súa avoa Mima comeza a esvaecerse, as súas palabras, as cartas e as imaxes familiares adquiren unha nova dimensión. No regreso á súa historia, á súa vila e ao tempo compartido con ela, Manuel enfróntase á fugacidade da vida e atopa na música unha maneira de asumir a perda e preservar a pegada das persoas que o acompañaron.
As conversas con Mima, a calma do regreso e a necesidade de conservar algo dese mundo acompañan o nacemento das cancións. A curtametraxe achégase así ao espazo íntimo do que xorde a música de El Nieto Manuel, entendida como unha forma de expresar o vivido e transformar a ausencia en creación artística.
A obra retrata o músico no momento en que comeza a construír unha identidade propia, que espertou interese de maneira orgánica e que o levou a compartir escenario e música con artistas como Sílvia Pérez Cruz, Valeria Castro, Miguel Poveda, Lila Downs e Carminho.
Unha historia filmada durante tres anos
El Nieto Manuel nace do vínculo persoal entre Manuel Navas e o director Darío Vázquez. Tras tres anos de gravacións, ambos deron forma a unha historia de carácter íntimo e artesanal.
A película supón o debut na dirección de Vázquez, fotógrafo galego afincado en Madrid que iniciou a súa traxectoria xunto a figuras como Mario Testino, Annie Leibovitz, Mert & Marcus e Venetia Scott. No seu paso ao cinema, traslada a súa mirada fotográfica a un territorio atento aos xestos, aos afectos e á naturalidade das relacións familiares.
A curtametraxe conta con música orixinal de Manuel Navas e cun destacado equipo creativo:
- Guión: Anna R. Costa e Malena González
- Montaxe: Rafael Martínez Calle
- Dirección de fotografía: Darío Vázquez
- Dirección de arte e estilismo: Juliette Da Luz
- Son directo e posprodución de son: Emilio Pascual
- Cor: Mario Lorente
- Produción executiva: Marta Miramón e Carmen Aguado
Estrea mundial na Seminci
A selección en IN-EDIT súmase á participación xa anunciada na Sección Oficial de Curtametraxes Españolas da 71ª Semana Internacional de Cine de Valladolid (Seminci), onde El Nieto Manuel celebrará a súa estrea mundial.
IN-EDIT leva máis de dúas décadas achegando á gran pantalla as historias que existen detrás da música. Consolidado como unha cita de referencia para o documental musical, o festival reúne cineastas, artistas e público arredor de películas centradas nas traxectorias dos músicos, nos seus procesos creativos e nas experiencias persoais que acompañan as súas cancións.
Sinopse
Cando a memoria da súa avoa comeza a borrarse, un neto grava o que aínda queda dela. Dese arquivo íntimo, e da imposibilidade de retela, nace un artista: El Nieto Manuel.
