Este sábado 31 de outubro, ás 11,00 horas, terá lugar no Carballiño a solemne apertura do Ano Xubilar da Vera Cruz, presidida polo bispo de Ourense, Monseñor Lemos Montanet, e concelebrada polos arcebispos de Santiago de Compostela, de Mérida-Badaxoz e emérito de Compostela; os bispos de Tui-Vigo e León; o párroco de San Cibrao do Carballiño, o seu vigario e outros sacerdotes a zona e de toda a Diócese.
Confirmaron a súa asistencia a esta celebración distintas autoridades civís, militares e xudiciais, entre eles o presidente do Parlamento, o presidente da Deputación de Ourense, o alcalde do Carballiño e doutros concellos da Comarca, deputados, senadorse e representantes da Xunta, do Concello de Ourense, da Garda Civil do Carballiño, da Policía Nacional e autoridades xudiciais, así como outras autoridades eclesiásticas (vicarios xenerais e episcopais, congregacións relixiosas e institutos seculares), a Xunta da Confraría da Beira Cruz do Carballiño e representantes do mundo da cultura e do ámbito educativo na vila.
Ás 10,30 horas terá lugar o repenique de campás con motivo desta solemne apertura, contando no Carballiño con nove campaneiros de toda Galicia da Asociación Sinos de Bronce. A continuación, ás 11,00 horas, comezará a procesión, coa Real Banda de Gaitas da Deputación de Ourense acompañando ás autoridades presentes, saíndo do Asilo pola rúa dúas Canteiros ata a Vera Cruz. Tamén a Coral Polifónica do Casino, o Orfeón do Carballiño e o Coro de Cámara Música Viva acompañarán toda a Eucaristía, así como un cuarteto de corda que tocará durante a misa o himno composto para este Xubileo, alén da Escola Cantorum do Seminario que completará o acompañamento musical dos distintos momentos da celebración.
Este Ano Xubilar supón unha ocasión de graza para toda a Diócese e para a vila do Carballiño, podendo lograr as indulxencias plenarias quen peregrine ao templo da Vera Cruz cumprindo os requisitos establecidos para iso, neste ano en que se cumpre o 75 aniversario do templo e os 125 anos da chegada da reliquia da Vera Cruz ao Carballiño.
