A Praza Maior do Carballiño prepárase xa para acoller, na tarde de hoxe, unha das citas máis emblemáticas da Festa do Pulpo: a elaboración da tapa de pulpo máis grande do mundo. Nesta 15ª edición, os pulpeiros e pulpeiras enfrontaranse ao reto de cortar 600 quilos de pulpo, seis veces máis cantidade que en 2010, o primeiro ano no que se bateu o récord mundial con 100 quilos.
En comparación con 2024, este ano os cortadores terán 10 quilos máis de pulpo nos caldeiros. Para a elaboración da tapa empregaranse tamén oito quilos de sal, 54 litros de aceite e tres quilos de pimentón doce e salgado. O prato no que se realizará, que xa está colocado na Praza Maior, ten un diámetro de 5,37 metros.
A cita comezará ás 20,00 horas, co troceado dos pulpos e o seu aliño para a súa posterior distribución entre os asistentes, que deberán mercar previamente uns tiquets ao prezo de 7 euros na caseta da Asociación de Pulpeiros do Carballiño, ubicada na parte alta da Praza Maior. Cada tiquet dá dereito a unha tapa de pulpo nun prato especialmente gravado para a ocasión, pan, un vaso de viño, postre, unha pulseira e un chaveiro realizado pola asociación Aspadisi.
A organización dispuxo a instalación dunhas mesas para a degustación na zona da rúa Aldara colindante coa Casa do Concello. O colectivo de pulpeiros de Arcos calcula que se servirán unhas 1.800 tapas, e o acto contará coa animación e ambientación musical do DJ Tibu.
