O Concello de Ribadavia reorganiza o tráfico esta fin de semana no casco histórico da vila para asegurar o correcto desenvolvemento da Festa da Istoria. A montaxe e desmontaxe dos diferentes postos do mercado medieval e das áreas de xantar fan necesario restrinxir o estacionamento e o tráfico nas rúas Salgado Moscoso, Banda La Lira, Yáñez e Praza de San Xoan desde mañá xoves, ás 18,00 horas, ata o domingo 31, ás 22,00 horas.
Pola súa parte, o resto de rúas e prazas do casco histórico terán o tráfico e estacionamento limitado desde as 18,00 horas do venres 29 ata as 22,00 horas do domingo 31.
O Concello emitiu un bando informativo sobre estas alteracións no tráfico o pasado 21 de agosto, e o día 22 xa se colocaron carteis en diversas zonas da vila para informar á veciñanza. Desde o goberno local piden desculpas polas posibles molestias e chaman á máxima colaboración da poboación con servizos municipais e coa organización da Festa da Istoria para, un ano máis, desfrutar ao máximo da tradicional celebración.
O Concello habilitará aparcamentos disuasorios no patio do IES O Ribeiro e no Polígono Industrial de San Cristovo, para que os visitantes poidan estacionar os seus vehículos nas aforas da vila. Ademais, o Concello fleta autobuses rotatorios de 10,00 a 22,00 horas o sábado, día grande da Istoria, desde Francelos, San Cristovo e Sampaio, para facilitar o transporte desde os núcleos próximos a Ribadavia.
