“Sabedoras, cociñas e cociñeiras memorables do Ribeiro-Carballiño” é un proxecto de investigación antropolóxica centrado na cociña tradicional das dúas comarcas e das súas valedoras: as mellores cociñeiras do rural, promovido polo Xeodestino Ribeiro-Carballiño.
Así, o stand deste destino turístico de Galicia no marco do 26º Salón Internacional de Turismo Gastronómico (Xantar), foi, na tarde do pasado sábado o escenario escollido para a entrega dos diplomas de recoñecemento ás mulleres máis representativas da cociña tradicional das dúas comarcas. Un acto no que participaron os presidente do Xeodestino e do Inorde, Francisco Fernández e Rosendo Fernández, ademais de alcaldesas, alcaldes e representantes dos concellos do Carballiño e O Ribeiro.
OS MELLORES ESTABLECEMENTOS
E tres foron as elexidas no Carballiño: Ana Corral, de Cafés La Carballiñesa; María José Cerviño, de Confitería Cerviño, e Pilar Fuchela, de Pulpería Fuchela, se ben tan só acudíu a recoller o seu galardón Jesús Rivera Corral, fillo de Ana. A concelleira de Servizos Públicos e Benestar Comunitario, Rosa Fuentes, foi a encargada de entregarllo e de levar os dous diplomas restantes ás agraciadas ausentes.
Asemade, levouse a cabo a presentación do devandito proxecto e da súa guía gastronómica, a cargo do antropólogo Xoel Méndez e do historiador Xavier Castro, rematando o acto cunha demostración e degustación dalguns das receitas tradicionais destas cociñeiras, que serán reinterpretadas pola chef Begoña Vázquez.
