O grupo municipal de Espazo Común solicita a “dimisión inmediata” do concelleiro de Deportes e eventual alcalde do Carballiño, José Castro, por permitir a utilización do pavillón Paco Chao para acoller a primeira edición da Romaría Provincial do Partido Popular, que tivo lugar nestas instalacións deportivas municipais o pasado sábado.
Dende esta formación política da oposición no Concello apuntan que “o que non debería pasar de ser unha xuntanza para o autoaplauso e coa, sempre positiva, chegada de centos de visitantes ao Carballiño, converteuse, nas máns dos populares locais, nun caos, nun malgasto de recursos públicos e no estragamento de propiedades municipais”. Ao respecto, suliñan que, “de feito, nun partido celebrado o domingo pola mañá, as queixas de pais e nais de deportistas polo mal estado que presentaba non foron poucas”, en referencia á pista anexa do pavillón no que se celebrou o xantar, que tamén obrigou á modificación ou aprazamento de varios eventos deportivos programados entre o venres e o sábado desta pasada fin de semana.
OS MELLORES ESTABLECEMENTOS
Por outra banda, Espazo Común avanza que “tamén dirixiremos un escrito ao presidente da Deputación, promotor do evento, para que se dean á cidadanía explicacións pola presenza de vehículos da flota do ente provincial no dispositivo que este domingo desmontaba a toda velocidade a infraestrutura empregada o sábado”.
