O proxecto contará cun investimento total de 48.000 euros e permitirá mellorar a seguridade, a eficiencia enerxética e a posta en valor deste enclave emblemático do municipio.
O Concello de Leiro e a Axencia Instituto Enerxético de Galicia (Inega) subscribiron un convenio de colaboración para desenvolver un proxecto experimental de iluminación ornamental e eficiente na ponte colgante de Leiro.
A actuación contará cun orzamento total de 48.000 euros, IVE incluído. O Inega achegará 40.000 euros, mentres que o Concello de Leiro contribuirá con 8.000 euros.
O proxecto busca converter a ponte colgante nun referente nocturno, reforzando a seguridade e o confort das persoas usuarias, así como o seu valor patrimonial, paisaxístico e turístico. A intervención tamén permitirá reducir o consumo eléctrico e as emisións de CO₂ mediante a instalación de sistemas de iluminación LED de alta eficiencia.
Actuacións previstas
Os traballos comprenderán, entre outras medidas:
- A retirada das luminarias e dos elementos asociados existentes.
- A instalación de 30 novas luminarias LED de baixo consumo:
- 12 luminarias lineais RGBW.
- 8 proxectores LED.
- 10 proxectores LED de iluminación focalizada.
- A colocación de sistemas que eviten a emisión innecesaria de luz cara ao hemisferio superior.
- A renovación do cableado e das canalizacións eléctricas.
- A instalación dun cadro secundario de mando e protección.
- A execución das instalacións de posta a terra.
- A incorporación dun sistema de control que permitirá regular e adaptar a iluminación ás diferentes necesidades, eventos ou festividades.
As novas luminarias terán un deseño discreto e integrado na contorna, coa finalidade de realzar a estrutura da ponte e a paisaxe próxima sen prexudicar o carácter natural do enclave.
Un proxecto experimental e sostible
A ponte colgante de Leiro, construída a mediados do século XX sobre o río Avia, constitúe un dos elementos máis representativos da identidade local e un espazo moi frecuentado pola veciñanza e polas persoas visitantes, especialmente durante os meses de verán e nas celebracións municipais.
Debido ás características da infraestrutura e á súa localización nunha contorna natural de especial sensibilidade, o proxecto funcionará como unha experiencia piloto para probar solucións avanzadas de iluminación eficiente, control e aforro enerxético. Os resultados poderán servir de referencia para futuras actuacións noutros espazos de características similares.
A intervención permitirá avanzar cara a un modelo máis sostible de xestión do alumado público, en consonancia cos obxectivos de aforro e transición enerxética promovidos pola Xunta de Galicia e pola Unión Europea.
Prazo de execución
O convenio manterase vixente ata o 31 de decembro de 2026, e a documentación xustificativa das actuacións deberá presentarse antes do 15 de decembro de 2026.
Con esta iniciativa, o Concello de Leiro continúa traballando na conservación e mellora dos seus espazos singulares, reforzando a seguridade, a accesibilidade e o atractivo turístico e cultural da ponte colgante e da súa contorna.
