A concelleira Sofía García propón un Consello Municipal da Muller para activar políticas de igualdade no Carballiño

---------------------------------------------------------------------------------------------------------

---------------------------------------------------------------------------------------------------------

A concelleira non adscrita do Concello do Carballiño, Sofía García, presentará no pleno do vindeiro mércores unha moción na que insta ao goberno municipal á creación do Consello Municipal da Muller, un órgano estable que permita ás mulleres participar activamente na definición, no seguimento e na mellora das políticas municipais de igualdade.

Sofía García considera que a igualdade real e efectiva entre mulleres e homes continúa sendo un dos grandes retos da sociedade e que os concellos, pola súa proximidade á cidadanía, teñen unha responsabilidade fundamental na identificación das desigualdades e na posta en marcha de políticas públicas que respondan ás necesidades reais das mulleres.

“A igualdade non pode limitarse a organizar actividades arredor do 8 de marzo ou do 25 de novembro. Esas datas son fundamentais para reivindicar dereitos e denunciar as desigualdades e as violencias, pero o compromiso dunha administración pública debe demostrarse durante os 365 días do ano”, manifesta Sofía García.

A iniciativa cobra especial relevancia nas vésperas do 25 de novembro, Día Internacional da Eliminación da Violencia contra as Mulleres. Para a concelleira, a loita contra a violencia machista precisa moito máis que declaracións institucionais ou campañas puntuais: require prevención, educación en igualdade, sensibilización, recursos públicos, atención ás vítimas e unha resposta institucional coordinada e continuada.

“Non abonda con condenar a violencia cando se produce. Temos que traballar tamén sobre as desigualdades estruturais que a perpetúan e impulsar políticas municipais que contribúan a construír unha sociedade máis xusta e igualitaria”, conclúe.

PUBLICIDADE---------------------------------------------------------------------------------------------------