O PP pide a dimisión de Rodríguez Villarino e González Afonso pola instrumentalización política da Subdelegación do Goberno

IES CHAMOSO LAMAS

• O secretario xeral dos populares ourensáns, Rosendo Fernández, esixiu coñecer xa que ou quen ordenou a revisión de legalidade das axudas concedidas pola Deputación a pemes e autónomos. “Queremos saber se houbo inxerencia política nesta actuación, pero aínda hoxe só obtivemos o silencio como resposta”.

AUDIO Rosendo Fernández

HIPER MASIDE

• A orixe desta situación, afirmou, atópase en “a historia política do señor Villarino, que é a historia da mentira, a traizón e a manipulación”, e para a que agora ten “un socio necesario, o subdelegado do Goberno, que só parece obedecer as súas ordes”.

O secretario xeral do Partido Popular de Ourense, Rosendo Fernández, esixiu hoxe a dimisión “ ipso faccto” do secretario provincial dos socialistas ourensáns, Rafael Rodríguez Villarino, e do subdelegado do Goberno, Emilio González Afonso, “pola instrumentalización política dun organismo, a Subdelegación, que sempre fixo gala dunha exquisita neutralidade institucional, na que prestan o seu servizo excelentes e modélicos profesionais, pero onde falla estrepitosamente a súa cabeza visible”.

Nunha comparecencia ante os medios de comunicación, na que estivo acompañado por Jorge Pumar, vicesecretario xeral dos populares ourensáns, e Pablo Pérez, secretario de organización, Rosendo Fernández esixiu coñecer xa que ou quen ordenou a revisión de legalidade das axudas concedidas pola Deputación a pemes e autónomos. “Queremos saber se houbo inxerencia política nesta actuación, pero aínda hoxe só obtivemos o silencio como resposta a pesar de que o 28 de maio e o 9 de xuño a Deputación solicitou ter acceso ao expediente”.

Todo o contrario que a propia institución provincial, que desde o primeiro momento puxo ao dispor do grupo provincial socialista toda a información solicitada “nun escenario de absoluta transparencia”.

A pesar diso, denunciou o secretario xeral, “Rodríguez Villarino e González Afonso non deixaron de entorpecer, obstaculizar e petardear as axudas a autónomos e pemes da Deputación, xerando unha polémica estéril e persistindo na súa actitude a pesar de coñecer a legalidade de todo o proceso, avalada por un informe do secretario xeral da Deputación, que teñen na súa poder”.

A orixe desta situación, afirmou, Fernández, atópase en “a historia política do señor Villarino, que é a historia da mentira, a traizón e a manipulación”. Chegou a ser candidato á alcaldía de Ourense “despois de dar paus a todo o seu partido cunha actitude destrutiva, e se non que lle pregunten ao seu mentor, Pachi Vázquez, ao seu outra rival, Noela Blanco, ou a Francisco Fraga, a quen colocou de portavoz na Deputación despois de apartar ao que agora parece ser o seu aliado, o ex alcalde de Ribadavia e deputado provincial Ignacio Gómez, por non falar do último alcalde socialista de Ourense, Agustín Fernández, ou do último portavoz no Concello de Ourense, Vázquez Barqueiro, que se foi porque lle cambiaron a lista das municipais”.

Engadiu Fernández que este é “o secretario provincial do PSOE de Ourense con menos empatía da historia do socialismo ourensán, arrastrando o seu odio polas esquinas desde que se frustraron as súas expectativas de ser alcalde da capital ou presidente da Deputación. Ía a desparasitar a institución provincial, dicía, e o desparasitaron a el”.

Lembrou tamén que o primeiro que fixo ao chegar á Deputación “non foi preocuparse pola Deputación, senón por el mesmo, pedindo a compatibilidade da súa actividade profesional e facéndose cunha dedicación exclusiva para cobrar 200 euros máis ao mes que no Concello de Ourense, onde tamén é portavoz e onde tamén pon obstáculos ás axudas”.

Para Rosendo Fernández resulta incomprensible a dirección que exerce no grupo socialista provincial, “ausentándose do debate do estado da provincia, votando en contra do que reclama a FEMP, presidida por unha alcalde socialista e galego, antepoñendo un protocolo para non apoiar o loito oficial na provincia en homenaxe ás vítimas da pandemia, ou non apoiando a creación da comisión Ourense Futuro, que dará voz aos axentes económicos e sociais desta provincia”.

No seu deriva, denunciou o secretario xeral dos populares, “agora mente e traizoa a Ourense, a un sector, o empresarial, que necesita de todo apoio, e faio cun socio necesario, o subdelegado do Goberno, que só parece obedecer as súas ordes”. Un “ mitinero socialista en campañas electorais a pesar do seu cargo como representante institucional, e que a pesar desta condición non convocou reunión algunha das administracións que operamos no territorio durante a pandemia, cando o Goberno de España ostentaba o mando único e a el corresponderíalle impulsar a colaboración”.

“Non culpamos ao PSOE, nin aos seus cargos, nin aos candidatos, nin aos militantes nin votantes –engadiu- pero por hixiene democrática estas persoas viles e serviles están inhabilitadas para exercer a representación política”.