Galicia en Común vén de presentar unha iniciativa na Cámara Baixa para coñecer a situación de máis dunha ducia de proxectos vinculados a diversas estradas da provincia de Ourense. O voceiro e deputado da formación pregunta pola situación dos tramos A Veiga de Cascallá-O Barco de Valdeorras Leste, así como do tramo Requeixo-A Veiga, ambos da A-76. Entre as estradas polas que se pregunta atópanse a A-56 no tramo que une a cidade das Burgas con Lugo ou a rehabilitación do firme do punto quilométrico 210,2 ao 217 no tramo entre Sandiás e Allariz.
Na iniciativa presentada polo grupo parlamentario pregúntase, entre outros, polos proxectos das sendas peonís en Razamonde, no concello de Cenlle. Así mesmo, tamén se solicita información sobre a rehabilitación do firme na A-52, a autoestrada que vertebra a provincia de Ourense, entre os quilómetros 112,2 e o 138.
