O delegado territorial da Xunta en Ourense, Gabriel Alén, mantivo hoxe por videoconferencia un encontro cos alcaldes de Avión, Antonio Montero, Castrelo de Miño, Avelino Pazos, Cortegada, Avelino de Francisco, e a alcaldesa de Porqueira, Susana Vázquez, aos que informou sobre a concesión de máis de 95.000 euros para proxectos de mellora enerxética nos catro municipios.
Alén informou que as axudas permitirán substituír as actuais caldeiras de gasóleo por biomasa na Casa Roja de Avión cunha achega de 11.616 euros, e na Casa do Concello, de 22.860 euros. No caso do concello de Castrelo de Miño, esta iniciativa pretende axudar á instalación de dúas caldeiras de biomasa na vivenda comunitaria, cunha inversión que supera os 8.000 euros e outra na aula CeMIT, superando os 9.500 euros. No caso de Cortegada, a contribución da Xunta estará destinada a instalar esta modalidade enerxética de caldeira no centro cultural, cunha inversión similar de máis de 8.000 euros e xa fora da comarca do Ribeiro, en Porqueira, a mesma instalación para a residencia de maiores, que ascederá a unha inversión de 34.500 euros.
Unha suma de 95. 479,84 euros en axudas aos catro concellos, aos que hai que engadir a liña orzamentaria destinada a empresas e particulares cunha achega de 328.251 euros; que fan un total de 423.730 euros na provincia de Ourense.
Deste xeito, o delegado territorial da Xunta destacou a aposta do Goberno galego por lograr unha Galicia máis verde, a través de apoios que buscan fomentar tanto o uso das enerxías renovables como unha maior eficiencia enerxética, tanto no eido dos fogares galegos, como das administracións, empresas e entidades.
Gabriel Alén tamén subliñou que “a Xunta de Galicia segue co seu labor de apoio aos concellos en todas as áreas e atendendo ás súas necesidades e, loxicamente, unha cuestión de tanta importancia como a eficiencia enerxética, que permite aforrar recursos e dotar aos espazos públicos de maior comodidade, está entre as prioridades do Goberno galego”.
Por outra banda, cómpre lembrar que xa están abertas dúas convocatorias para impulsar as enerxías renovables e a eficiencia enerxética nas empresas. Trátase, en concreto, da liña de axudas para proxectos de empresas e autónomos do sector agrícola primario que contan cun orzamento de 2,5 millóns de euros, o que facilitará a mobilización dun investimento final público-privado de 8,5M€ en aproximadamente 200 iniciativas. Promoveranse instalacións de biomasa, biogás, aerotermia, xeotermia, solar térmica, fotovoltaica e eólica, así como actuacións de mellora da eficiencia que reduzan o consumo inicial en polo menos un 40% en proxectos de iluminación ou nun 10% no resto de iniciativas.
Tamén está aberto o prazo para solicitar axudas para realizar proxectos de aforro e eficiencia enerxética en empresas dos sectores industrial e de servizos. Destinaranse 10M€ co obxectivo de mobilizar máis de 42M€, e propiciar un aforro enerxético equivalente a nove millóns de litros de gasóleo ao ano, así como un aforro económico de 7M€ anuais nas facturas enerxéticas e a creación de 340 empregos.
