• Antonio Rodríguez Miranda mantivo unha videoconferencia cos responsables da iniciativa que pretenden honrar o legado dos máis de 8.000 galegos que formaron parte da execución desta obra

O secretario xeral da Emigración, Antonio Rodríguez Miranda mantivo nas últimas horas unha reunión cos membros da Fundación Nosa Terra de Panamá aos que se apoia no impulso do proxecto de instalación dun monumento dedicado aos máis de 8.000 galegos que traballaron na construción do canle que une o Atlántico co Pacífico.

Na videoconferencia estiveron presentes o presidente da asociación, Ricardo Gago, o tesoureiro, Daniel Pichel, así como Juan Carlos Barreiro, Manuel Pico e Francisco Sieiro.

Tal e como lle trasladaron ao secretario xeral, a Fundación Nosa Terra naceu co propósito de renderlle un homenaxe a todos os galegos que participaron na construción do Canle de Panamá no ano 1904, xa que, ademais, moitos deles prolongaron a súa estancia naquel país e incluso se asentaron e fundaron unha familia.

“Para a Xunta de Galicia sería unha cuestión de xustiza poder levar a cabo a instalación deste memorial a todos eses galegos que formaron parte dunha obra de enxeñería tan esencial para o desenvolvemento económico da humanidade”, explicou Antonio Rodríguez Miranda.

A idea da construción dun monumento xurdiu o ano pasado, en plena pandemia, para o que esta Fundación comezou a recoller datos sobre a obra destes máis de 8.000 galegos, “dos cales destacaban os responsables da obra a súa gran capacidade de traballo e a súa excelente calidade. De feito segundo destacou por escrito o enxeñeiro xefe da obra, Frank Stevens, cada galego valía por tres dos seus compañeiros. É unha honra para nós que sexan recordados dun xeito tan destacado”.