Na Xunta de Portavoces celebrada esta mañá no salón de plenos do Concello de Ourense abordáronse varias cuestións, periodicidade dos vindeiros plenos, participación dos non adscritos nas comisión de pleno e pleno extraordinario sobre o Imposto de vehículos de tracción mecánica.
En relación coa segunda cuestión, o alcalde aporta un informe, sen asinar, do asesor xurídico, a modo de borrador. Ese informe entra na cuestión da representatividade así como no réxime retributivo dos grupos, provocado a raíz da expulsión nun dos casos dun concelleiro, e do abandono nos restantes casos tanto en DO como en Cs.
Este informe ven a defender a idea de que o abandono dos concelleiros e concelleiras, pasando a ser non adscritos, non pode menoscabar os dereitos que os grupos teñen desde a súa constitución.
Para o BNG, e tendo en conta que o informe foi aportado na propia reunión, e que fai múltiples referencias a distintas normas e sentenzas, cómpre analizalo en detalle antes de fixar unha posición ao respecto.
Pleno extraordinario IVTM
Con respecto á rebaixa do IVTM o alcalde fixo constar na convocatoria que ía dar datos sobre o IVTM, datos que, segundo denuncia o BNG, non aportou na reunión, e que dixo “facilitarei no día de maña”.
Luis Seara, portavoz do BNG no Concello de Ourense afirma que “nós non entramos, tal e como fixemos no pleno ordinario, a valorar datos”. E engade, “Como xa dixemos, o relevante é o feito en sí da rebaixa, algo máis de 2 millóns de euros que deixa de ingresar o concello e que o coloca nunha situación económica problemática á futuro”.
Segundo Luis Seara “o concello precisa recursos para poder dar uns servizos de calidade, e estes recursos obtéñense dos impostos que pagamos as veciñas e veciños”
