A Xunta licitará en outono as obras de urbanización do parque público de Outeiro Cruz na Arnoia

A conselleira de Medio Ambiente, Territorio e Vivenda e o alcalde asinaron esta semana un convenio de colaboración

O convenio fixa un orzamento de case 330.000 euros para a materialización da actuación coa que se pretende construír unha nova zona de ocio e descanso para os veciños

A Xunta de Galicia licitará este outono as obras de urbanización dun novo parque público no lugar de Outeiro Cruz, no concello da Arnoia, cun orzamento previsto de case 330.000 euros

Publicidade Premer na Imaxe

A conselleira de Medio Ambiente, Territorio e Vivenda, Ángeles Vázquez, avanzou esta previsión ao alcalde, Rodrigo Aparicio, ao que recibiu esta semana na Consellería para asinar o convenio de colaboración polo que se executarán estes traballos, o que permite avanzar na tramitación da actuación.

O parque ocupa unha parcela situada entre o adro da Igrexa parroquial de San Salvador, o tanatorio, a estrada OU-402 e o centro de día, polo que é unha zona moi visitada pola veciñanza que convén humanizar e mellorar para facilitar este tipo de servizos, ademais de proporcionar unha área de ocio e descanso.

Así, proponse a creación dun parque público, con ramplas para facilitar o acceso, novos pavimentos, axardinamento, mobiliario urbano e alumeado público; polo que será necesario rozar, limpar e nivelar os terreos, ampliar a rampla que facilita o acceso ao centro de día e colocar pasamáns de aceiro inoxidable nas ramplas peonís.

Esta actuación execútase a cargo do plan Hurbe, onde o Goberno galego achega o 70% e o Goberno municipal o 30% restante, un programa impulsado pola Xunta fai máis dunha década co fin de axudar ás entidades locais a executar diferentes proxectos urbanísticos destinados á creación, mellora e humanización de infraestruturas de uso público e colectivo.

Tal e como lle indicou Ángeles Vázquez, o compromiso do departamento que dirixe brindando este apoio aos concellos é promover actuacións que, como esta, contribúan a dinamizar as vilas galegas e melloren a calidade de vida dos seus veciños.