En España
A nivel nacional o paro descendeu en 76.113 persoas, situando a cifra total de desempregados rexistrados na oficina de emprego en 3.257.802.
Esta baixada supón un 2,28% menos en comparación co mes anterior, e un 13,73 menos se a comparación é anual.
A Seguridade Social contabiliza un total de 19.531.111 afiliados tras un aumento medio en setembro de 57.387 cotizantes
Continúan en ERTE 239.230 persoas, unhas 33.000 menos que no mes anterior, e principalmente relacionadas con actividades como restauración, aloxamento, turismo e viaxes.
En Galicia
Aínda que a baixada do paro foi xeneralizada a nivel nacional, Galicia e outras 5 comunidades ademais da cidade autónoma de Melilla non seguen esta tendencia e rexistraron aumentos nas cifras de desemprego.
Galicia atópase no segundo lugar destas comunidades con menor incidencia desta subida, rexistrando un 1,18% de aumento, entre Andalucía que suma un 0,55% e Baleares cun 1,41, sendo a comunidade con maior aumento do paro Asturias, cunha subida do 4,12%.
En Galicia, a suma de desempregados sitúase en 153.054, tras incorporar 1.790 persoas no mes de setembro. En termos anuais, a evolución do desemprego si reflicte un descenso, que é do 13,32% e tradúcese en 23.520 persoas menos nesta situación en relación a setembro de 2020.
Todas as provincias galegas rexistran un aumento nas listas de desempregados, aínda que cunha pinza ampla que vai desde as 58 persoas en Pontevedra ás 983 de Coruña. Ourense e Lugo suman 194 e 555 persoas, respectivamente, ás listas do paro.
A afiliación en Galicia en xullo situouse en 1.034.229 persoas, o que supuxo un descenso de 5.241 afiliados con respecto ao mes anterior. A variación anual lanza un aumento de afiliados de 22.430 (2,22% con respecto a setembro de 2020).
Na comunidade, contabilízanse aínda un total de 9.842 persoas baixo a figura do ERTE.
En Ourense
En Ourense o paro aumentou no mes de setembro en 194 persoas, un 1,11%, situando a cifra de desempregados na provincia en 17.607.
Ourense contabiliza un total de 103.802 afiliados á Seguridade Social tras o descenso de 264 afiliados do pasado mes (-0,25%). En termos interanuais a variación é positiva e suma 833 afiliados (0,81%).
Na provincia quedan aínda 1.193 traballadores en ERTE, o que indica un descenso de 213 desde o último mes.
Comentarios sobre os datos
Os datos non se comportan de igual maneira en todas as comunidades e, no caso de Galicia e Ourense, experimentaron un aumento no número de desempregados, o que sucede tamén noutros 5 territorios (Andalucía, Asturias, Baleares, Cantabria e Melilla).
A pesar de ir deixando atrás a pandemia e as súas restricións, e de que a campaña de vacinación está case completada, estes feitos non se reflicten nos datos que experimenta Galicia e Ourense.
A pesar do esforzo que realizan empresas, traballadores e sector público por recuperar a normalidade, outros datos macroeconómicos fan rebaixar o optimismo sobre a intensidade no proceso de recuperación, como unha revisión á baixa do crecemento do PIB para o segundo trimestre, do 2,8% ao 1,1%, ou máis recentemente o aumento da inflación ata o 4% en setembro, a taxa máis alta en 13 anos; feitos que provocan unha recuperación da economía menor da esperada.
Os aumentos nos prezos da enerxía, as materias primas, ou a escaseza de microchips e outros materiais, viñeron a embazar unha recuperación que parecía enfilada tras o descenso das cifras de contagios polo virus e o fin de moitas restricións.
A prioridade agora é consolidar unha recuperación que ten aínda indicios de incerteza, e apostar por medidas eficaces para afianzar o emprego, para facilitar a creación de empresas alixeirando as trabas burocráticas, para formar ás persoas desempregadas ou en ERTE, e para eliminar os elementos de incerteza, rixidez e incremento de custos que lastran decisións empresariais e de investimento nun curto-medio prazo.