Miranda participa nos actos de promoción do Xacobeo organizados polo Lar Gallego de Sevilla co gallo do XII Encontro de Casas Rexionais e Provinciais

A Praza Nueva desta localidade contou con expositor promocional que permitiu achegar o Camiño a miles de sevillanos e turistas

Publicidade

No transcurso da romaría que se organiza de xeito simultáneo no parque do Alamillo tivo lugar un acto de homenaxe aos alcaldes dos concellos polos que pasa a Vía da Prata pola súa labor en pro da difusión do Xacobeo 21-22

O secretario xeral da Emigración, Antonio Rodríguez Miranda, asistiu este domingo aos actos do XII Encontro de Casas Rexionais e Provinciais celebrado en Sevilla baixo o lema “España en Sevilla”, no que estivo presente un stand promocional do Xacobeo 21-22 que permitiu achegar o Camiño a miles de sevillanos e turistas.

O secretario xeral, acompañado do presidente do Lar de Sevilla, José Antonio Otero, e do presidente da Asociación de Amigos del Camino de Santiago de Sevilla-Vía da Prata, Juan Ramos Plaza, visitou os dous expositores que se situaron na Praza Nueva da capital andaluza relacionados con Galicia, un deles centrado no Xacobeo 21-22, dun total de 17 stands que se instalan neste espazo dedicados ás diferentes casas rexionais de toda España.

Miranda quixo agradecer “a oportunidade que brinda o Lar Gallego de Sevilla e a propia cidade para poder mostrar as bondades do Camiño de Santiago neste encontro de casas rexionais tanto aos propios sevillanos, como a cantos visitantes pasaron por este lugar durante estes días”.

O secretario xeral da Emigración tamén participou na tradicional Romería do Lar Gallego de Sevilla, acto no que se levou a cabo unha homenaxe a seis dos alcaldes dos concellos por onde transita a Vía da Prata de Andalucía e Estremadura, en agradecemento pola labor de difusión e promoción deste Camiño de Santiago, coa imposición dunha insignia de prata e un diploma. Dende a Secretaría Xeral, fíxoselles entrega dun agasallo en recoñecemento pola súa labor. Ao remate deste acto celebrouse un concerto das pandereteiras Xacarandaina.