Editorial: ” Chegamos as 10000 novas”

IES CHAMOSO LAMAS

Pasaron 20 meses dende que BADAL NOVAS vise luz como un novo medio de comunicación creado para que dese cobertura a este espazo xeográfico que conforman as comarcas do Carballiño e do Ribeiro, un medio que veu transformar o xeito de recibir a información sobre o acontecer cotián dos seus habitantes e para achegala ós que están fóra grazas á hoxe imprescindible internet.

Ideado como un medio de proximidade dentro dun mundo globalizado, O BADAL leva traballado dende o seu arrinque como un vehículo de transmisión de opinión e de información, no que as entrevistas, as reportaxes, o mundo dos nosos emigrantes ou as variadas colaboracións de importantes persoeiros, viñeron dar un novo aire ó mundo da comunicación comarcal. Aínda que realizado cuns recursos limitados, o constante esforzo dos seus profesionais e a progresiva mellora dos sistemas tecnolóxicos, fan de nós un medio distinto, recoñecible e, sobre todo, de confianza.

HIPER MASIDE

Neste máis dun ano de existencia, tocounos convivir coa maior das desgrazas sanitarias dende a gripe de 1918: o COVID 19. Este suceso fixo que houbese que centrarse a diario, dun xeito especial, no seu paso e incidencia centrando nel unha boa parte da actividade informativa pero, sempre, sen descoidar os outros focos de atención da información que, dende o inicio, caracterizan a este medio. Así a crónica de cada concello, os acontecementos culturais e sociais, os sucesos, os plenos municipais e outras moitas novas, couberon na grella da nosa programación cotiá.

E volvendo ó inicio, nestes vinte meses O BADAL leva aportado 10.000 novas a todas aquelas persoas que seguen a nosa actividade a diario. Unha cifra moi grande para un medio pequeno. Unhas novas que están definidas pola súa constante actualización, pola súa cercanía, pluralidade, diversidade temática e o acompañamento da imaxe.

Dez mil novas -para os amantes da estatística- nun período de 20 meses son 500 novas cada mes: un grande esforzo informativo e unha teima que pagou a pena facer e que, por descontado, seguiremos facendo.


Estes son os datos de Badal Novas despois de 20 meses

10000 novas publicadas

10000 grazas a todos