- O taller gratuíto “Emprendemento cooperativo no medio rural: oportunidades de negocio”, que se celebrará en liña, consta de 5 sesións. Comeza o día 24 de novembro.
- O taller gratuíto “A economía social e a modernización do sector agroalimentario: certificacións de calidade e ambientais” desenvólvese nunha plataforma de formación con acceso 24horas, entre o 1 de decembro e o 14 de xaneiro.
- A inscrición efectúase en www.agaca.coop.
O vindeiro mércores, 24 de novembro, comeza o taller “Emprendemento cooperativo no medio rural: oportunidades de negocio”, que é en liña e gratuíto.
Desenvólvese en 5 xornadas (en novembro, os días 24, 26 e 29; en decembro, o día 1 e o 3, sempre de 10:00 a 13:00 h.): importancia social e económica do emprendemento, oportunidades de negocio, elaboración do plan emprendedor, fórmula cooperativa e axudas públicas e xeración de ideas.
Por outra banda, o 1 de decembro comeza un taller de teleformación titulado “A economía social e a modernización do sector agroalimentario: certificacións de calidade e ambientais” que termina o 14 de xaneiro.
Realízase nunha plataforma en liña de formación e o alumnado pode acceder aos contidos en calquera momento, ata completar as tres unidades temáticas: Cooperativismo no sector primario, Certificacións de calidade (ISO, GLOBALG.A. P., BRC/IFS e vacún de leite) e Certificacións de calidade ambientais (ISO, análise de ciclo de vida e pegadas de carbono e hídrica). A duración estimada é de 70 horas.
As persoas interesadas en calquera dos dous cursos poden matricularse en www.agaca.coop e pedir información no 981 58 47 83.
AGACA (Asociación Galega de Cooperativas Agroalimentarias) imparte estes cursos, que se enmarcan na programación 2022 da Rede Eusumo. A Rede Eusumo é unha rede de colaboración impulsada pola Xunta de Galicia para o fomento do cooperativismo e a economía social, que conta con financiamento do Ministerio de Trabajo y Economía Social.
