A asemblea local do BNG de Allariz súmase á campaña de apoio ao comercio local lanzada polo partido e anima á súa veciñanza a apostar polo comercio de proximidade e polos produtos galegos nas súas compras de Nadal.
Como é sabido, o comercio local foi un sector gravemente golpeado pola pandemia. O BNG propón unha Nova Lei do Comercio, consensuada e pactada co sector, que inclúa entre as súas medidas a regulación de horarios e tempadas de rebaixas para frear a competencia desleal por parte das grandes multinacionais; unha liña de axudas específicas para a modernización e a dixitalización do novo comercio ou a aprobación dunha moratoria á apertura de grandes superficies comerciais.
Allariz ten unha actividade comercial dinámica, con variedade de pequenos comercios que ofrecen todo tipo de produtos, moitos deles galegos e, incluso, da mesma Reserva da Biosfera. Animamos, polo tanto, a tódolos veciños e veciñas a apoiar este tipo de comercios cando se acheguen a mercar os seus regalos de Nadal.
