A Consellería de Infraestruturas e Mobilidade iniciou hoxe as obras de dotación de acceso ao parque empresarial de Beariz dende a estrada O-212, que suporán un investimento de 445.000 euros.
A intervención, que ten un prazo de execución de 4 meses e está previsto que remate a principios do próximo ano 2023, ten como obxectivo dotar ao futuro parque empresarial dun acceso cómodo e seguro desde esta estrada autonómica, para reforzar a competitividade e o potencial empresarial do municipio. .
Esta actuación é froito dun estudo onde se analizaron seis alternativas, tendo en conta a xeometría da vía, a funcionalidade e a seguridade viaria. A solución concreta está recollida no Plan Especial de Creación de Solo Industrial do Concello de Beariz, desenvolvéndoo segundo o previsto na memoria de sustentabilidade ambiental do plan.
Actuarase, concretamente, ao longo duns 250 metros na estrada OU-212 na marxe esquerda da estrada, executando un cruzamento que permita todos os desprazamentos, especialmente os vehículos pesados que se acheguen ao polígono.
A obra inclúe a dotación de cuñas de aceleración e desaceleración de 30 metros de lonxitude para facilitar a unión á vía e tamén a saída ao polígono en condicións de seguridade, así como un carril central de espera para favorecer os xiros desde esta vía á zona de negocios, pensando de ofrecer maiores facilidades aos camións.
Na zona onde se realiza a nova conexión, o trazado está formado por unha recta duns 400 metros de lonxitude que, aproximadamente no seu punto medio, presenta unha estrutura de vigas prefabricadas que permite o paso sobre o regueiro existente.
A intervención contemplará a instalación de canalizacións de servizo baixo a berma que sirva de protección contra corrementos de terra, en previsión da futura necesidade de dar continuidade á iluminación do parque empresarial, de xeito que só se fará a instalación de postes e cableado.
