Manuel Baltar demanda na Xunta de Goberno da FEMP ter “moi en conta as tensións orzamentarias derivadas da inflación e a suba de prezos da enerxía e os combustibles”

O presidente da Deputación sinala as consecuencias do actual contexto económico para a realidade das administracións locais

Ourense, 27 de setembro de 2022.- O presidente da Deputación de Ourense, Manuel Baltar, participou esta tarde por videoconferencia na Xunta de Goberno da Federación Española de Municipios e Provincias (FEMP). Unha reunión na que recalcou a necesidade de ter “moi en conta as consecuencias do actual contexto económico para a realidade das administracións locais”.

AVANTAR ACTIVIDADES

“A inflación e a suba de prezos da enerxía e os combustibles vai poñer contra as cordas a moitos municipios e provincias”, analizou Manuel Baltar antes de demandar ter en conta como está a afectar ás facendas locais cuestións como a sentenza da plusvalía; o déficit que acumulan os servizos de transporte público de titularidade das entidades locais afectados pola crise da Covid-19; ou a suba de prezos dos materiais de obra. “Unha cuestión que pode provocar desviacións importantes nos orzamentos anuais”, destacou o presidente do goberno provincial de Ourense. 

“O encarecemento dos materiais de obra está a obrigar a recalcular proxectos de obra pública para non perder fondos europeos”, asegurou Manuel Baltar xunto a outros alcaldes e presidentes provinciais, advertindo a continuación que “o atraso que leva España na execución dos fondos Next Generation vai obrigar a moitas corporacións locais a facer axustes nos seus orzamentos”.

Con este horizonte, na Xunta de Goberno solicitouse a elaboración dun informe do impacto que está a ter a inflación nas arcas municipais. Ademais, tamén abordouse a necesidade de celebrar unha nova Comisión Nacional de Administración Local (CNAL) para incluír cuestións preocupantes para as administracións locais, e coñecer os resultados do estudo sobre como está a impactar a anulación da plusvalía municipal polo Tribunal Constitucional nas contas dos gobernos municipais.