O PSdeG-PSOE de Ourense levará unha moción ao pleno do venres para reclamar unha nova folla de ruta que permita desbloquear, canto antes, o Plan Xeral de Ordenación Municipal (PXOM), e que garanta un desenvolvemento urbano “legal, sostible e de futuro” para Ourense. Para isto, o grupo socialista esixirá que o Goberno local proceda á convocatoria da comisión de seguimento do PXOM e que se actualice o documento inicialmente aprobado en 2013, coa finalidade de asegurar a súa garantía xurídica e evitar unha nova caída do plan coma a acontecida en 2011.
“A historia do urbanismo nas últimas décadas ten sido definida pola mala xestión do Partido Popular” denunciou Natalia González, quen condenou que a tónica habitual na xestión dos populares foron “os pelotazos urbanísticos, a especulación, o cambiazo de planos ou a condonación do 10 % dos aproveitamentos urbanísticos aos promotores da cidade”.
“Por mor desta nefasta xestión do Partido Popular, en 2022 estamos cun plan xeral de hai 36 anos” lamentou, ao tempo que lembrou que o goberno do PSdeG-PSOE de Ourense entre 2007 e 2015 conseguiu sacar adiante un plan ao que máis tarde se incorporaron as modificacións do Partido Popular e Jácome, cambiando por completo o sentido e “esencia” do documento inicial.
No texto da iniciativa, as e os socialistas lembran que en xuño de 2021 reclamaron a convocatoria urxente da comisión de seguimento do PXOM, logo de que o actual alcalde, Gonzalo Pérez Jácome, anunciara a súa intención de completar o expediente do novo plan e proceder á súa aprobación cun total de sete modificacións que el mesmo encargou introducir ao equipo redactor.
“Hoxe o que hai é un documento ‘Frankenstein’ cheo de providencias de Cudeiro e de ocorrencias de Jácome, inviable e con visos de ilegalidade”, advertiu a socialista, quen insistiu na necesidade de retomar o plan aprobado en 2013, algo sobre o que o propio Manuel Cabezas, actual presidente do Partido Popular na cidade, manifestou publicamente estar de acordo, confirmando así un cambio de postura en canto aos pasos a seguir para a aprobación definitiva da nova normativa urbanística.
Así mesmo, as e os socialistas demandan que, unha vez revisado e actualizado, se realice unha segunda exposición ao público do plan, co fin de garantir a súa legalidade e seguridade, e sobre todo, para apuntalar a legalidade e seguridade do futuro urbanístico de Ourense.
“Ourense non pode permitirse outra caída dun plan xeral, temos que facer un documento no que o consenso, a seguridade e a responsabilidade sexan as claves”, insisten dende o grupo socialista.
Saúdos.
