Actos do dia 3 de decembro
Salón do IES nº 1 do Carballiño
O próximo sábado, día 3 de decembro, o Instituto de Estudios Carballiñeses (IEC) celebra a asemblea xeral de socios, na que se proporán 30 persoas como novos socios ordinarios do Instituto (escritores, médicos, empresarios, profesores, funcionarios…) e cinco “socios de honra” (Marisa Crespo -cardióloga e profesora da Universidade da Coruña (UDC), V Premio Ágora do Orcellón-, Ignacio Morgado -catedrático de Psicobioloxía da Universidade Autónoma de Barcelona e Director do Instituto de Neurociencia da mesma Universidade-, Adolf Tobeña -catedrático de Psiquiatría da Universidade Autónoma de Barcelona-, José Luis Verdegay -catedrático de Intelixencia Artificial (IA) da Universidade de Granada- e Camilo José Cela Conde -catedrático de Filosofía do Dereito e de Antropoloxía da Universidade Complutense de Madrid.
O Director do Instituto informará das actividades realizadas ao longo deste ano e dos proxectos para o próximo ano, entre os que destacan seis novas publicacións.
A continuación, terá lugar a presentación do número 39 da revista Ágora do Orcellón e de dúas publicacións máis: Derradeiros poemas de Manuel Vilanova e O románico na comarca de Ourense. Intervirán no acto de presentación algúns dos colaboradores da revista para explicar a temática dos seus artigos. Amenizará o acto a cantante María do Ceo.
E para rematar o acto, realizarase un acto de homenaxe ao Arenteiro Club de Fútbol polos seus éxitos deportivos e por levar o nome do Carballiño polo mundo, entregándolle un obsequio como recordo deste acto ao seu presidente, Argimiro Marnotes, que estará acompañado por un integrante da dirección técnica e un capitán do equipo. Os exfutbolistas carballiñeses Cesáreo Rivera e Pepe Carballeda, ambos socios do IEC, participarán no acto de entrega e de felicitación do equipo do Arenteiro, no que xogaron os seus primeiros anos como profesionais.
A asemblea xeral iniciarase ás 11,15h e será exclusiva para os socios do IEC; en cambio, a presentación das publicacións, que comezará ás 12.00 horas, será aberta ao público, así como a homenaxe ao Arenteiro, que dará comezo ás 13.30h. Asistirán ao acto o alcalde do Carballiño e os representantes dos partidos políticos da corporación así como autoridades provincias e autonómicas, entre elas o Secretario Xeral de Política Lingüística, Valentín García.
