Luís Seara, viaxou a Lleida para manter varios encontros de traballo coas autoridades locais e coñecer polo miúdo os proxectos implementados en materia de rehabilitación e recollida de residuos
O actual Portavoz municipal e candidato á alcaldía polo BNG ao Concello de Ourense Luís Seara, acompañado por Xosé Carballido, membro da candidatura, desprazouse este xoves á cidade catalá de Lleida para manter varios encontros de traballo tanto con autoridades locais, reunirase co propio alcalde da mesma, como con altos cargos da Generalitat de Catalunya para coñecer e contrastar os novos modelos impulsados desde o Executivo de Aragonés e referidos ao sistema de recollida e tratamento de residuos.
Seara fixa como obxectivos da viaxe “coñecer novas experiencias de xestión no referido tanto á rehabilitación e posta en valor das zonas históricas e no caso de Lleida, as similitudes con Ourense son moitas, como por coñecer os novos modelos de recollida e tratamento de residuos impulsados desde este concello e a Generalitat e que ao noso entender cobran gran importancia tendo en conta que en Ourense a concesión deste importante servizo está nestes momentos caducada”.
A axenda que tanto Luís Seara como Xosé Carballido teñen por diante é intensa. Pola mañá levarán a cabo unha ruta polo Centro Histórico acompañados do alcalde, Miquel Pueyo, a actual concelleira do barrio, Montse Pifarré, e a número 8 da candidatura de ERC nas próximas eleccións e veciña do barrio, Ikram Bouhouche.
Posteriormente manterán unha reunión centrada nos novos modelos e contratos de recollida de residuos, encontro no que estarán presentes o actual concelleiro de Transición ecolóxica do concello de LLeida, Jaume Rutllant, o xefe de gabinete, Josep Maria Romero e o número 3 da lista de ERC Juanjo Falcó.
Finalmente, Seara aproveitará para reunirse con membros da Executiva local de Esquerra en Lleida.
