Os deputados do BNG Iago Tabarés e Noa Presas, acompañaron ao concelleiro do BNG de Celanova, Leopoldo Rodríguez e membros do BNG de Celanova para demandar a elaboración dun plan integral de desenvolvemento económico para Celanova por parte da Xunta de Galiza en colaboración co concello da vila.
“Desde o BNG demandamos un plan integral que permita por en valor o patrimonio monumental e histórico de Celanova, como pulo de desenvolvemento turístico”. Declaraba o deputado do BNG Iago Tabarés, que continuou sinalando que asemade cumpre apoiar e por en valor o comercio local e de proximidade como elemento dinamizador da vida económica e social da vida ao tempo que permita o desenvolvemento e conservación dos nosos sectores produtivos.
Desde a fronte nacionalista tamén constatan a necesidade da elaboración dun plan xeral de ordenación municipal que dote a Celanova do chan industrial preciso para asentar novas empresas.
A Xunta de Galiza e o concello de Celanova non poden continuar pasivos ante o devalo económico, social e demográfico dunha vila e dunha comarca, a de Celanova, con extraordinarios recursos e de extraordinarias capacidades que para a súa posta en valor precisa do impulso e dunha planificación que corresponde ao sector público
Declarou tamén Tabarés que para o Bloque Nacionalista Galego é inexcusábel o remate da AG-31 até a fronteira portuguesa, esencial para vertebrar o país, como para potenciar o desenvolvemento económico da Galiza interor.
Por iso desde o BNG demandamos un plan integral de desenvolvemento económico para Celanova con participación, implicación e compromiso tanto da Xunta de Galiza como do propio concello de Celanova.
