A primeira edición desta novidosa iniciativa, organizada pola Deputación, culminou con éxito e coa participación de máis de 100 inscritos de diferentes perfís
O laboratorio serviu para identificar retos baseados na educación ambiental; na transparencia dos servizos e a súa prestación en territorios con elevada dispersión; o control e inspección ambiental; a economía circular; a dixitalización aplicada á infraestrutura do servizo; así como as taxas e as inversións para aplicar melloras
Todas as ideas recolleranse nun documento que pretende trasladar á gobernanza unha visión global da problemática actual dos residuos, e servir como liñas estratéxicas de actuación que marquen as políticas de goberno da institución provincial
Ourense, 5 de abril de 2024.
A Deputación de Ourense desenvolveu con notable éxito o I Laboratorio de Innovación aberta en xestión de residuos, “Ourense Renova”, no centro Cultural Marcos Valcárcel. Os pasados días 1 e 2 de abril participaron nesta novidosa iniciativa colaborativa máis de 100 persoas de diferentes perfís, entre os que se atopaban técnicos, representantes políticos e axentes do sector económico, educativo ou social.
A Deputación, que puxo en marcha esta actividade en colaboración coa consultora SustainableStartup&Co, tiña por obxectivo principal abordar os desafíos relacionados coa xestión dos residuos municipais nos municipios rurais da nosa provincia.
Na sesión do 1 de abril recompiláronse todos e cada un dos retos detectados na sociedade e nas administracións, e que están relacionados co gran reto formulado no pre-laboratorio organizado pola Deputación: “Reducir, separar e recoller de maneira máis eficiente os residuos na provincia de Ourense para evitar custos innecesarios”.
Os retos que se recolleron entre todos os participantes abranguen os seguintes ámbitos: educación ambiental; transparencia do servizo prestado; consenso técnico-político; a prestación do servizo a unha poboación envellecida e cunha elevada dispersión; o control e inspección ambiental; economía circular e xestión do residuo orgánico en orixe; dixitalización e novas tecnoloxías aplicadas á infraestrutura do servizo; aplicación de taxas que recollan o pago por xeración; e inversión para a aplicación das melloras.
Estes retos serviron de guía para que, no segundo día do Laboratorio, se realizasen novas mesas de traballo na busca de diferentes solucións, consensuadas e pactadas entre todos os asistentes as xornadas. Así, entre as solucións aportadas xurdiron propostas como a creación dun equipo de educadores ambientais provinciais; a necesidade de aprobar unha taxa máis xusta que repercuta o “pago por xeración”; a agrupación, reorganización e dixitalización de contedores; a creación de canles de comunicación e transparencia sobre os custos do servizo aos cidadáns; e a promoción de iniciativas de colaboración de agrocompostaxe, entre outras.
Todas as ideas deseñadas neste laboratorio recolleranse nun documento que pretende trasladar á gobernanza unha visión global da problemática actual dos residuos, dende diferentes puntos de vista. Á súa vez ten a intención de servir de guía para elaborar liñas estratéxicas de actuación que poidan culminar en diferentes políticas de goberno para a institución provincial ou reforzar aquelas nas que xa ven traballando a Deputación.
