A Festa da Vendima de Leiro, que este ano alcanza a súa 33ª edición, comeza cos preparativos. Neste caso, dende o concello xa fixeron públicas as bases para o concurso de carrozas da vendima, que se celebrará durante a mañá da xornada festiva.
Entre os requisitos, os integrantes terán que ser maiores de 16 anos. A temática terá que ser referente á vendima, antes ou despois da colleita da uva; así como os relacionados coa adega e elaboración do viño ou os diferentes traballos nas viñas.
Os membros da carroza terán que ir ataviados con roupas acordes co tema escollido. Establécense tres premios, 1.000 euros para o primeiro, 750 para o segundo e 600 euros para o terceiro.
As carrozas participantes que non obteñan ningún dos tres premios entregaráselles un premio de participación de 400,00 euros.
Toda carroza terá que inscribirse no concello de Leiro, acudindo persoalmente e ofrecendo uns datos básicos de inscrición.
