O Concello de Ribadavia pon en marcha o programa “Concilia no Nadal”, unha iniciativa dirixida a facilitar a conciliación das familias durante as festas de Nadal e Reis. Este servizo estará dispoñible para nenos e nenas de 3 a 14 anos en varias xornadas: os días 23, 24, 26, 27, 30 e 31 de decembro, e o 2, 3 e 7 de xaneiro, e en horario de 8,30 a 14,00 horas. As solicitudes poderán presentarse entre os días 4 e 12 de decembro a través da sede electrónica de Ribadavia (ribadavia.sedelectronica.gal) ou nas oficiñas do departamento de Servizos Sociais na Casa do Concello.
Os prezos contemplados para esta campaña de conciliación son de 25 € para participantes empadroados no municipio; 15 € para familias numerosas, monoparentais e a partir do segundo irmá, e, finalmente, 50 € para non empadroados. Este programa, que conta co apoio da Xunta de Galicia, a Consellería de Política Social e Igualdade, e o Ministerio de Igualdade, forma parte do plan “Corresponsables” e ten como obxectivo principal ofrecer un espazo seguro e educativo para os máis pequenos durante as vacacións escolares.
