O grupo municipal de Espazo Común presentará ante a Corporación do Carballiño dúas mocións para o seu tratamento na sesión ordinaria do vindeiro xoves. Na primeira, propoñen a construción das beirarrúas en ambas marxes da estrada que une os núcleos de Partovia e do Porto de Eguas. Consideran que “é esta unha vella demanda dos veciños da zona que xa merece ser atendida dunha vez pois trátase dun área moi transitada na que o perigo para os peóns é patente”. Engaden que “estamos a falar dunha estrada de titularidade autonómica, a OU-208, que neste tramo é case toda unha recta polo que a velocidade dos vehículos, en moitos casos, é moi superior á aconsellable”. Unha estrada na que “os viandantes vense obrigados a circular polo mesmo firme ante a ausencia total de ningunha outra opción”, polo que entenden “é tempo de atender esta necesidade por parte das administracións implicadas”.
Na segunda moción, solicitan que “se execute con urxencia a obra de ampliación do túnel dos Catro Camiños para gañar unha gran cantidade de solo público para novas infraestruturas”. O grupo de Espazo Común lembra que hai agora dous anos, xa trasladaron ao pleno “unha moción case idéntica a esta que, por suposto, foi aprobada por unanimidade” e que se falou “da relevancia de acometer un proxecto transformador para a área dos Catro Camiños coa ampliación do túnel que cubre a vía do tren”. Apuntan que “a súa construción xa foi autorizada polo ADIF dende o ano 2009, e dende o 2010 existe xa un proxecto redactado só é necesario que o Concello se poña máns á obra para a súa execución“. Coa execución deste proxecto “os pequenos parques actuais situados a ambos lados da estrada, chegarían a unha superficie de arredor de 5.000 metros cadrados, permitindo ubicar neles zonas verdes, un gran parque infantil e zonas de ocio para xente de tódalas idades e incluso novas prazas de aparcamento moi necesarias na contorna“, conclúen.
