Ourense, 26 de novembro de 2024 || Nun acto simbólico e cheo de significado, Marisol Nóvoa, presidenta da CEO encargouse da lectura dun manifesto no patio de lle entidade, con motivo do Día Internacional da Eliminación da Violencia contra a Muller. Estivo acompañada para iso polo persoal da organización e representantes de asociacións como Beatriz Gómez (comercio), Olga Santos (artesanía) e Jesús de Dios (floristas).
Marisol Nóvoa comezou lembrando a orixe desta data, que cumpre 25 anos ao ser establecida pola ONU en 1999 para conmemorar o brutal asasinato das irmás Mirabal, activistas políticas de República Dominicana, ocorrido o 25 de novembro de 1961, unha data que busca lembrar a loita global para erradicar todas as formas de violencia contra as mulleres.
Precisamente, a presidenta da CEO fixo referencia á diversidade de violencias, non só a física, senón tamén económica, psicolóxica, vicaria e outras, que se exercen contra a muller en todo o mundo, e a necesidade urxente de loitar contra todas elas e erradicalas, pois rexistran un preocupante aumento en concreto dun 12,1% entre 2022 e 2023, e ‘a piques de pechar o ano continúa esta tendencia á alza, con 41 mulleres asasinadas no que vai de ano e 26 menores orfos como consecuencia destes asasinatos’, lembrou a presidenta. Marisol Nóvoa fixo tamén alusión a que os últimos avances déronse, sobre todo, nas políticas das administracións en materia económica e de protección ás vítimas de violencia machista; e que na actualidade hai un índice moi elevado neste tipo de violencia entre a xente nova. Ao fío disto, reclamou máis políticas para enfocar nesta franxa da poboación a educación contra a violencia de xénero, tanto cara aos fillos como cara aos pais, e animar á denuncia que, tamén lembrou, aumentaron no último ano.
O manifesto subliñou a importancia de fomentar unha sociedade que rexeite calquera tipo de discriminación ou violencia, sobre todo desde a educación e desde as familias ‘Todos na medida das nosas posibilidades temos que concienciar e educar para conseguir erradicar esta violencia’, recalcou Marisol Nóvoa, quen engadiu que quedan aínda anos para que este problema social e público de primeira magnitude sexa eliminado, pero, engadiu, ‘hai que seguir avanzando e colaborar para eliminar esas situacións que poden desencadear en calquera tipo de violencia’.
Con este acto, a CEO non só reforza o seu compromiso institucional, senón que tamén se suma aos miles de colectivos e entidades que, en todo o mundo, alzan a voz contra un dos problemas máis perentorios desta época. Este manifesto, e o compromiso de toda a organización, subliñan a importancia de construír redes de apoio máis sólidas e promover sistemas máis efectivos de protección para as vítimas, mentres se segue traballando desde a educación e a sensibilización para previr e erradicar.
