O Instituto de Educación Secundaria Número Un do Carballiño (IES Nº 1) e o Centro de Educación Secundaria Trias Schulen da vila de Elsterberg, en Alemaña, protagonizarán nos meses de marzo de xuño do vindeiro ano un intercambio educativo e cultural no que participará un total de 40 estudantes co acompañamento de profesorado. O Trias Schulen Elsterberg, é un centro de ensino integrado na rede da Saxony International School, que agrupa centros de Primaria, Secundaria e Formación Profesional do estado alemán de Saxonia, colexios internacionais e de educación plurilingüe con profesorado internacional.
O alumnado do Trias Schulen estudia castelán como segunda lingua extranxeira despois do inglés, según comenta María Caíña, do Carballiño e profesora de Español neste centro de ensino alemán, e que foi estudante do IES Nº1. Ademais de aprender a manexarse no castelán e no alemán, o obxectivo deste intercambio é que o alumnado procedente de Elsterberg coñeza e poida mergullarse nos aspectos culturais e ambientais da comarca do Carballiño e de Galicia en xeral, tendo en conta que as dúas vilas están enclavadas nunha contorna rural.
Os estudantes alemáns estarán oito días do mes de marzo na vila do Arenteiro e a expedición carballiñesa devolverá a visita do 12 ao 20 de xuño. Aínda que o alemán non figura nos contidos do IES Nº1, sí está a lingua inglesa, que pemitirá unha comunicación verbal máis fluída entre o alumnado dos dous centros, ademais de que poidan interesarse na aprendizaxe dos seus respectivos idiomas.
