Os efectivos do Servizo municipal de Emerxencias de Ribadavia, integrado polo Grupo de Emerxencias Supramunicipal (GES) e o voluntariado de Protección Civil, levaron a cabo case 1.000 intervencións neste 2024, 909 en concreto, en operativos de auxilio en accidentes, extinción de incendios e, principalmente, en actuacións de colaboración e apoio en prevención de riscos e á realización de eventos. Así, os equipos mobilizáronse nun total de 113 accidentes de tráfico e laborais, e participaron na extinción de 62 incendios, dos cales 20 foron urbanos, 15 forestais e 13 de automóbiles, entre outros.
A memoria elaborada por este Servizo de Emerxencias e que resume as intervencións realizadas ao longo do ano que hoxe remata tamén recolle outras 732 actuacións máis destacadas. Entre elas, sete de auxilio á persoas en situacións difíciles no seu domicilio; tres de salvamento; cinco de procura de persoas desaparecidas e 30 de apertura de portas e ascensores, e, estas últimas, levadas a cabo en presenza das forzas de orde pública. Asemade, atenderon 111 incidencias en estradas e vías públicas (verquidos medioambientais, obstáculos, pólas, árbores e inundacións, entre outras); 78 por chamadas ou reclamacións vencelladas á animais, e 152 de actividades de renovación e mantemento de trampas para a vespa velutina, nunha campaña preventiva na que se efecturaron 2.584 capturas en primavera e 130 no pasado outono.
O GES e o voluntariado de Protección Civil tamén participaron en 32 operativos de prevención de riscos orixinados por fugas de gas, avarías eléctricas, colocación de sinais, limpeza de sumidoiros, derrubes e activación dos umbrais do río Avia, entre outros, destacando, sobre todo, os 272 operativos de apoio en eventos tales como a Feira do Viño, a Festa da Istoria e outros actividades culturais e deportivas. Os efectivos do Servizo de Emerxencias de Ribadavia estiveron presentes en catro ocasións para axudar no rescate de persoas afogadas e en 38 de apoio sanitario ao helicóptero do 061.
Finalmente, na memoria de Emerxencias, neste 2024, contabilízanse 10 persoas falecidas en sinistros, correspondentes a accidentes de tráfico (3), laborais (2) e con maquinaria agrícola (1); na súa vivenda (2), en mobilización asistencial (1) e afogamento en ríos (1).
