O stand de Galicia na Feira Internacional de Turismo (FITUR) acolleu a presentación da proposta turística “Terras que saben” do GDR Valdeorras, integrado polos concellos de A Veita, Larouco, O Barco de Valdeorras, O Bolo, Petín, Rubiá, Vilamartín de Valdeorras, A Rúa e Carballeda de Valdeorras. A Deputación Provincial de Ourense colabora co Plan de Sostibilidade Turística de Valdeorras, “Ruta Milenaria”, (financiado polo Plan de Recuperación, Transformación e Resiliencia a través de Fondos Next Generation), que xestiona o GDR Valdeorras, e o Inorde é o ente xestor do Xeodestino que abarca este mesmo territorio.
“Trátase dun exemplo de cooperación entre tódalas administracións, para traballar no desenvolvemento turístico dunha enocomarca que alberga hoxe unha das variedades de uva máis apreciadas no mundo, o godello, que, sen dúbida, será o protagonista desta Ruta Milenaria”, explicou Rosendo Fernández na presentación. A proposta que fai Valdeorras, engadíu, “é un lema moi axeitado, “Terras que saben”, pola dobre referencia a sabor e saber que aúnan o valor enogastronómico e histórico deste destino”.
Precisamente, a campaña presentada en FITUR xira ao redor da intención de representar aos viñedos e ás formas suaves e redondas da natureza local (montañas, ríos, vales…). Asimesmo, a páxina web foi renovada por completo dacordo cos atributos da nova marca, optando polo dominio ‘.travel’, que favorece o posicionamento en buscadores do ámbeto do turismo e as viaxes. Así, a partir de agora, poderán buscar tódolos datos turísticos desta campaña en www.valdeorras.travel, dotada cun contido de calidade profesional, e que tamén inclúe un mapa interactivo con descripción e xeorreferenciación de cada un dos recursos e servizos turísticos do territorio dos nove municipios de Valdeorras.
Asemade, tamén se deu a coñecer o programa de experiencias ecosostibles que se está a levar a cabo por parte do Inorde, con 13 emprendedores locais deste territorio.
