Seis días despois da denuncia feita polo grupo municipal de Espazo Común do Carballiño sobre o conflito de intereses dalgúns membros da mesa de contratación para a xestión do ciclo da auga, esta formación política vén de presentar no Rexistro do Concello toda a documentación anunciada. A presenza na comisión seleccionadora dun funcionario da Deputación de Ourense, Javier Bobe, que tamén é conselleiro da sociedade Aquaourense, participada por Viaqua, unha das empresas que concorren á adxudicación, espertou sospeitas en Espazo Común, que cualificaron o proceso de “unha trama”, urdida polo presidente provincial Luis Menor coa connivencia do grupo popular na Corporación, cuxo voceiro, José Castro-Gil, “foi quen de vetar a representación política na mesa de contratación”.
Según a formación que lidera Manuel Vázquez, “a pesares de que pode que esteamos ante o maior escándalo na historia democrática do Concello do Carballiño, ao quedar demostrado que algúns representantes públicos pretendían manipular o contrato dos 60 millóns de euros da auga, tanto o goberno PP-PSOE coma a Deputación de Ourense seguen sen dar unha soa explicación á cidadanía”. Engaden que “é dunha gravidade extrema que, a estas alturas, ninguén saíra a dar respostas aos veciños sobre o que semella unha trama organizada para teledirixir este proceso”.
Por iso, esta mañá, os membros do grupo municipal de Espazo Común rexistraron a documentación “que acredita estes feitos para que se tomen as medidas oportunas con urxencia”. Esta información está dirixida ao alcalde, secretaria, tesoureira, membros da mesa e grupos municipais do resto de partidos para que se aclare todo canto antes. “De non ser así, valoraremos outras alternativas. Entre elas, acudir aos xulgados”, conclúen.
Fontes da Deputación Provincial de Ourense subliñaron que “o nomeamento da mesa de contratación foi únicamente responsabilidade do Concello do Carballiño”. Engadiron que “a Deputación só respostou a unha petición do Concello para a participación de tres técnicos na mesa, que así foron propostos”. Conclúen que “estes técnicos son funcionarios, non son traballadores de ningunha empresa”. Por outra banda, dende o goberno municipal do Carballiño apúntase que a solución está en que a Deputación propoña o nomeamento doutro técnico para substituír a Javier Bobe na mesa e así evitar calquera conflicto de intereses.
