O PSdeG-PSOE de Ourense celebrou hoxe a IV edición de ‘ConMemora’, a xuntanza do socialismo provincial ourensán baixo o lema “Alén da Posverdade”. Lobios acolleu un acto multitudinario no que se congregaron máis de 250 socialistas chegadas de toda a provincia e no que estiveron presentes numerosos cargos orgánicos e institucionais do partido.
Esta nova edición de ConMemora volveu servir para estreitar os lazos de unión entre a militancia socialista da provincia, nun acto moi emotivo e cargado de contido que tivo como epicentro “a cerna política na acción de superación da posverdade, e seu espírito afectivo na fraternidade que bebe dos mananciais da ilustración e a democracia”.
O voceiro do grupo municipal socialista en Lobios, Patrick Rodríguez, foi o encargado de abrir o acto, no que tamén inteviron a profesora titular de Ciencia Política da Universidade de Santiago de Compostela, María Nieves Lagares Díaz; Vasco Ribeiro, profesor de Comunicación Política da
Universidade de Porto. e o presidente do Laboratorio de Ideas de Progreso AVANZA do PSOE, Manuel Escudero Zamora. A presidenta do PSdeG e senadora por Pontevedra, Carmela Silva Rego, interveu para destacar que “nestes tempos da posverdade, das fake news e dos retrocesos en dereitos, as mulleres temos que crear unha rede global para defender eses dereitos nun mundo en igualdade, pois somos nós as que máis padecemos estes retrocesos”.
O secretario provincial, Rafael Rodríguez Villarino, puxo o foco en que a imaxe da política actual “afástase da que se tivo de políticos coma Pablo Iglesias Posse, fundador do PSOE”, xa que tal e como esgrimiu “atopámonos con políticos como Donald Trump, ao que lle atoparon máis de
30.000 mentiras nas plataformas de verificación durante o seu anterior mandato”. “Esta xornada non ambiciona atopar respostas máxicas, pero si poñer enriba da mesa a necesaria atención do socialismo ourensán a este fenómeno, e por iso agradecemos o maxisterio das figuras que nos acompañaron hoxe”, finalizou Villarino.
Un ano máis fixéronse entrega dos premios ConMemora ao compromiso co socialismo e cos concellos da bisbarra da Baixa Limia, que nesta edición recaeron na histórica líder socialista de Bande, Maribel Santos Pérez, e no exalcalde de Lobios, Antonio Ferreira López. Durante o acto tamén se lembrou con moito agarimo a figura de Rafael Pérez Martínez “Tito”, que foi alcalde
socialista de Muíños entre 1983 e 1995, así o como o primeiro concelleiro socialista da corporación municipal e primeiro deputado provincial da historia do PSdeG-PSOE de Ourense, e que faleceu fai uns meses nun fatídico accidente.
O acto rematou coa interpretación do Grândola Vila Morena e do himno de Galicia por parte da agrupación musical Os Afinantes, para posteriormente dar paso a un xantar que se celebrou no restaurante Lusitano, e que pechou a xornada de comuñón socialista.
