O Potiños promove unha nova mostra de imaxes escollidas polos propios integrantes desta asociación de fotógrafos afeccionados, e que baixo o epígrafe ‘Potiexpo 2025’ poderase visitar dende mañá no interior da Casa do Concello do Carballiño. Esta iniciativa que o colectivo leva a cabo con carácter anual foi presentada hoxe polo concelleiro de Cultura, Diego Fernández, e o presidente de O Potiños, Manuel Blanco.
Diego Fernández resaltou que “O Potiños representa un dos artífices máis fortes da programación cultural, e que tamén nos acompaña na vida social da nosa vila”, e convidou a acudir “a ver a arte que se esconde detrás de cada unha das fotografías que se van exponer”. E, finalmente, agradeceu á asociación “que ofreza unha excelente alternativa cultural ao Carballiño”.
Pola súa banda, Manuel Blanco comentou que “Potiexpo é unha colección de 19 instantáneas que cada fotógrafo escolle porque para él é a mellor, e que estará na Casa do Concello nos meses de abril e maio”. Tamén anunciou que, con posterioridade, esta mostra “pasará despois aos 16 puntos de referencia que posuimos tanto no Carballiño coma no resto da provincia”.
Asemade, apuntou que, no cartaz que publicita a exposición, figura por vez primeira o logo da Deputación Provincial de Ourense, “xa que asinamos con eles un convenio para o patrocinio do ‘Arenteiro Fotográfico’ e das nosas actividades ao longo do ano”. O presidente de O Potiños tamén lembrou a viaxe que fixeron 12 integrantes do colectivo a Marrocos na semana pasada, “e que cecais poida plasmarse nunha exposición”.
