A directora xeral da Axencia Galega de Desenvolvemento Rural, Paz Rodríguez, reuniuse hoxe co presidente do Grupo de Desenvolvemento Rural (GDR) Carballiño-Ribeiro e alcalde de Leiro, Francisco Fernández, para avaliar proxectos de interese para estas comarcas ourensás. Ademais, a xuntanza tamén serviu para tratar asuntos relacionados co desenvolvemento rural que se están a levar a cabo no concello de Leiro, entre o que destaca o polígono agroforestal de Barzamedelle, co que se mobilizarán 145,6 hectáreas de terreo.
Cabe lembrar que dito polígono permitirá mobilizar 145,6 hectáreas de superficie, divididas en 183 parcelas propiedade de 113 veciños, e está baseado na multifuncionalidade e biodiversidade con respecto aos usos tradicionais na comarca do Ribeiro. Neste senso, establécense como usos ou actividades principais os cultivos leñosos -como viñedo e froiteiras-, de ciclo curto e sistemas agroforestais (sistemas de aproveitamento mixto fundamentalmente gandeiro e forestal -frondosas caducifolias- e, nalgún caso, algún tipo de cultivo agrícola complementario para o aproveitamento gandeiro e compatible cos outros dous).
Francisco Fernández tamén mantivo hoxe unha xuntanza co conselleiro de Presidencia, Xustiza e Deportes, Diego Calvo, para abordar as necesidades do municipio de Leiro e avaliar posibles vías de colaboración que, dende a Xunta, contribúan á execución dos proxectos municipais. Esta reunión enmárcanse no compromiso do Goberno galego coas entidades locais a través de distintas liñas de axudas que permitiron o ano pasado o impulso de case 700 iniciativas municipais, cun investimento de 32 millóns de euros.
