OS SOCIALISTAS DENUNCIAN A BALTAR ANTE O CONSELLO DE CONTAS POLO REPARTO A DEDO DE SETE MILLÓNS FRAGMENTADOS EN 160 CONTRATOS MENORES ENTRE CATRO EMPRESAS
Villarino detallou un “sistema a dedo que viola sistematicamente o espírito da lei de contratos” e preguntou por que a Deputación fixo firmar un papel ós alcaldes asegurando que non se fraccionaban obras
Gomez destacou que algunhas adxudicacións “son claramente un fraude de lei porque foron outorgadas por importe de 40.000 euros cando a lexislación di que deben ser inferiores a esa cantidade”
O PSdeG-PSOE denunciará ante o Consello de Contas de Galicia o “reparto a dedo” de sete millóns de euros, “fragmentados de forma presuntamente irregular en 160 contratos menores de obra” entre catro empresas, executado por Manuel Baltar ó longo dos dous últimos anos. Tamén trasladarán ó ente fiscalizador o mesmo proceder do goberno provincial nos contratos menores de subministros e servizos. Trala entrada en vigor da Lei 9/2017, a nova regulación sobre contratos públicos, a Deputación de Ourense repetiu estas adxudicacións menores, en moitos casos con importes exactamente iguais, no borde do límite máximo permitido, independentemente do obxecto e sempre entre as mesmas empresas.
Os socialistas analizaron polo miúdo os expedientes formalizados desde o 1 de xaneiro de 2018 e descubriron que ‘Manuel Viso e Hijos’ foi a principal empresa beneficiaria deste procedemento que non require concurso público, tras recibir 1,9 millóns en 58 contratos menores. A continuación sitúanse ‘Camiños de Ourense’ con 1,5 millóns en 40 contratos; ‘Coviastec’ con 1,4 millóns e 38 contratos; e Explotacións Medioambientais con 0,8 millóns en 24 contratos. A todos os importes de adxudicación destas obras en decenas de concellos da provincia hai que engadir o IVE.
O voceiro do PSdeG-PSOE, Rafa Villarino, explicou que estamos ante un “sistema de adxudicacións a dedo que viola sistematicamente o espírito da lei de contratos en vigor” polo que isto é “claramente” un “sistema sospeitoso de irregularidades”. “Que relación ten Baltar con este proceder?; Por que os importes das obras son iguais con obxectos distintos ou será que axustan todas as obras ata o límite para poder adxudicar a dedo?; Por que a Deputación esixiu ós alcaldes que asinasen un papel no que certificaban que as obras non estaban fraccionadas”?, preguntou o portavoz.
“Xa sabemos o que pasou nesta Deputación co persoal e agora pasaron á fase do descaro absoluto na contratación pública”, destacou o líder socialista quen tamén advertiu do “nerviosismo entre algúns traballadores que, en todo caso, non teñen a culpa, xa que a culpa recaerá en quen ordena este proceder irregular”.
O deputado, Nacho Gómez, dixo que “as sospeitas ante estas irregularidades non son de agora e xa levamos moio tempo investigando” pero “xa non podiamos seguir impasibles” e “alguén terá que explicar todo isto, polo que recorremos ó Consello de Contas para ter unha base xurídica máis sólida”. “A medida que a lexislación estatal foi reducindo o importe máximo destes contratos menores, o número de contratos por empresa desta Deputación aumentaba”, destacou o deputado antes de sinalar algunhas adxudicacións que “son claramente un fraude de lei porque foron outorgadas por importe de 40.000 euros exacto cando a lei di claramente que deben ser inferiores a esa cantidade”. “Todo o mundo pode equivocarse, pero son varios os casos deste tipo e a culpa non é dos funcionarios e si dos que mandan bordear a lei”, matizou o deputado.
Gómez tamén relatou o caso concreto dun “contrato menor” adxudicado á empresa ‘Editorial Compostela’ por importe 185.000 euros IVE incluído —moi superior á cantidade máxima de 15.000 euros— baixo o obxecto “subscrición ó periódico El Correo Gallego”. “Sabemos que existe unha disposición que ampara estas adxudicaciones maiores ó límite no caso concreto de publicacións, pero estamos a falar de 185.000 euros concedidos a dedo para unha empresa que non ten nin a sede social nin traballadores en Ourense e tampouco sabemos onde están os xornais que a Deputación compra”.
Os socialistas aclararon que, na súa análise, non se teñen en conta os contratos adxudicados polo procedemento ordinario mediante concurso, que estas empresas recibiron ó longo destes dous anos desde a institución ourensá.
Contratos menores
Detalle Contratos
Gráficos
