O xurado do “XL Premio Antón Losada Diéguez” decidíu conceder os galardons a Alberto Pombo, no eido de investigación e ensaio, e a Manuel Rivas no de creación literaria, dotados cada un deles cunha asignación de 6.000 euros. O xurado reuniuse esta mañá na Casa do Concello do Carballiño baixo a presidencia de Diego Fernández, concelleiro de Cultura deste municipio, que xunto co de Boborás e a Deputacion Provincial de Ourense son as institucions patrocinadores do certame.
A obra “Verso e acorde. Relacións entre a literatura galega e a música pop (1950-2000)”, cuxo autor é Alberto Pombo e foi publicado por Edicións Xerais, foi, a criterio do xurado merecente do premio de investigación e ensaio, pola “sinalada contribución ao coñecemento da “outra música”, necesario contrapunto ao fulgor da música tradicional, reflectido na dedicación do día das letras galegas 2025 ás Cantareiras”.
Asemade, tamén destacan deste traballo que “unha documentada tese de doutoramento está na orixe desta obra fascinante, que trae á luz a relación entre a música popular e -pop, rock, punk, heavy metal, bravú, música infantil- e a literatura galega. Combinando a abordaxe historicista coa nova metodoloxía dos estudos culturais, Alberto Pombo desprega ante o público lector a obra dunha xeración que soubo arrequecer o panorama musical do século XX desde o compromiso coa cultura de noso”.
Por outra banda, o xurado decidíu outorgar o premio en creación literaria a obra “Tras do ceo”, de Manuel Rivas e tamén editada por Edicions Xerais. Neste caso, o xurado valorou a calidade literaria e lingüística dunha novela “que, recuperando elementos xa clásicos na produción do autor, constrúe un universo narrativo absolutamente actual, pois pon o foco no choque entre a natureza e unha civilización que se revela como destrutora do hábitat que nos fai seres humanos”.
De Manuel Rivas salientaron que “o autor manexa con suma habelencia unha progresiva tensión narrativa creada a partir de diversas situacións de desigualdade e explotación, violencia e destrución, que pairan sobre o texto para inducirnos á reflexión e a profundizar en emocións e sentimentos dificilmente expresables”.
Ademais de Diego Fernández, formaron parte do xurado Rosa María Pérez e César Fernández, concelleira de Cultura de Boborás e deputado provincial de Cultura, respectivamente; Lourenzo Fernández, da Real Academia Galega; Dolores Vilavedra, do Consello da Cultura Galega; María Xosé Fernández, do Museo do Pobo Galego; e por Antonio Salgado, Benigno Salgado e Carme Fernández, coma representantes respectivos das universidades de Santiago, Vigo e A Coruña. Actuou como secretaria Julia Rodríguez, do departamento de Cultura do Concello carballiñés.
O acto da entrega dos premios a Alberto Pombo e Manuel Rivas terá lugar o sábado 14 de xuño no pazo da familia Losada, na localidade de Moldes, pertencente ao municipio de Boborás.
