A veciñanza da capital de O Ribeiro conmemora dende mañá a Pasión e Morte de Cristo cunha serie de actos promovidos dende a parroquia de Santo Domingo e a Cofradía de Nosa Señora do Portal coa colaboración do Concello de Ribadavia. Así, este Xoves Santo, estará prevista unha celebración penitencial ás 11,00 horas na igrexa de San Antonio.
Xa pola tarde, terá lugar na igrexa de Santo Domingo a Cea do Señor co rito do lavado de pés e o traslado en procesión do Santísimo Sacramento ao santuario do Portal, onde quedará instalado o monumeto. Ás 21,00 horas partirá da igrexa de Santiago a tradicional procesión “Dos Caladiños”, que percorrerá as rúas do casco histórico da vila. Na comitiva sairán os pasos de Xesús aranda no horto dos olivos, Criso atado na columna e o Ecce Homo. A xornada do xoves rematará cunha Hora Santa no santuario do Portal ás 22,00 horas.
O Venres Santo abrirase en Ribadavia ás 11,30 horas co Santo Encontro na Praza Maior, no que se lembra o camiño de Cristo cara o Monte Calvario cargando coa cruz. Alí poderán verse as imaxes do Xesús Nazareno, a Virxe das Dores, San Xoán Evanxelista e A Verónica.
Ás 18,30 horas celebrarase a Pasión do Señor na igrexa de Santo Domingo, e, ao seu remate, sairá a procesión do Santo Enterro coas imaxes da Virxe das Angustias, o Cristo Xacente e a Virxe da Soidade, para percorrer as rúas principais da capital do Ribeiro, co acompañamento musical da banda A Lira.
