O Centro de Estudios Chamoso Lamas organizou hoxe, en colaboración coa Cofradía da Vera Cruz e o Concello do Carballiño, un novo roteiro no que os historiadores e investigadores do colectivo carballiñés Juan Manuel Rodríguez e Xosé Luis Sobrado, explicaron a historia, arte e arquitectura das construcións relixiosas do Carballiño.
Rodríguez e Sobrado guiaron, dende as 11,00 horas, a unha trintena de persoas por un itinerario polas igrexas parroquiais de San Roque de Señorín e de San Cibrao; pola capelas do Sagrado Corazón e da Residencia dos Irmáns Prieto, ata chegar ao templo da Veracruz, punto final do percorrido.
Entre os participantes neste roteiro de Xoves Santo, programado polo Centro de Estudios para poñer en valor o patrimonio cultural do Carballiño, estiveron o concelleiro de Cultura, Diego Fernández, e o cofrade maior da Vera Cruz, Rafael Melero.
